Իսրայելի ռեժիմի կողմից Իրանի մի շարք տարածքների, այդ թվում՝ ռազմական օբյեկտների, միջուկային օբյեկտների և բնակելի շենքերի դեմ ռազմական ագրեսիայի կապակցությամբ, որի հետևանքով զոհվել և վիրավորվել են ռազմական հրամանատարներ, համալսարանական դասախոսներ և անմեղ իրանցի կանայք ու երեխաներ, Իրանի Իսլամական Հանրապետության արտաքին գործերի նախարար Աբբաս Արաղչին նամակ է հղել Անվտանգության խորհրդի նախագահին և ՄԱԿ-ի գլխավոր քարտուղարին:
Նամակում նա ագրեսիվ գործողությունները որակել է որպես Իրանի Իսլամական Հանրապետության դեմ պատերազմի հայտարարում և կոչ է արել Անվտանգության խորհրդին անհապաղ քննարկել այդ հարցը։
Նամակում արտգործնախարարը շեշտել է, որ Իսրայելի ռեժիմի հարձակումները Իրանի ինքնիշխանության և տարածքային ամբողջականության կոպիտ խախտում են որպես ՄԱԿ-ի անկախ անդամ պետություն, և բացահայտ ագրեսիա են Իրանի դեմ: Աբբաս Արաղչին պահանջել է Անվտանգության խորհրդի արտակարգ նիստ գումարել և հավելել. «Խորհուրդը պետք է կատարի իր պարտականությունները՝ համաձայն Կանոնադրության, խստորեն դատապարտի այս ագրեսիան և անհապաղ ու կոնկրետ գործողություններ ձեռնարկի՝ Իսրայելի ռեժիմին պատասխանատվության ենթարկելու համար»:
Արտաքին գործերի նախարարը նաև ընդգծել է Իրանի վճռականությունը՝ պաշտպանվելու ՄԱԿ-ի կանոնադրության 51-րդ հոդվածի համաձայն։
