ԱՄՆ վարչակազմը մտահոգված է Թայվանի մոտակայքում Չինաստանի «սադրիչ» ռազմական գործողությամբ և մտադիր է շարունակել աջակցել կղզային նահանգին անհրաժեշտ ինքնապաշտպանական կարողություններ տրամադրելու հարցում, հայտարարել է Պետդեպարտամենտի ներկայացուցիչ Նեդ Փրայսը:
«Մենք խորապես մտահոգված ենք Թայվանի մոտ Չինաստանի սադրիչ ռազմական գործողությամբ, որն ապակայունացնող է և խաթարում է տարածաշրջանում խաղաղությունն ու կայունությունը: Մենք կոչ ենք անում Պեկինին վերջ տալ Թայվանի դեմ ռազմական, դիվանագիտական և տնտեսական ճնշումներին և հարկադրանքին», – ասել է Փրայսը:
ԱՄՆ Պետդեպարտամենտի ներկայացուցչի հայտարարությունը հնչեց Պեկինից ստացվող այն լուրերի ֆոնին, որ շաբաթ օրը չինական բանակը գրեթե չորս տասնյակ ռազմական ինքնաթիռ է ուղարկել Թայվանի ափեր, հաղորդում է ՌԻԱ գործակալությունը:
