Սաուդյան Արաբիայի ղեկավարությունը կաջակցի ԱՄՆ նախագահ Ջո Բայդենի վարչակազմի՝ Իրանի միջուկային ծրագրի վերաբերյալ Գործողությունների համատեղ համապարփակ ծրագիրը վերականգնելու ջանքերին՝ պայմանով, որ Թեհրանը միջուկային զենքի չունենա: Այդ մասին հայտարարել է թագավորության արտաքին գործերի նախարար, արքայազն Ֆեյսալ բեն Ֆարհան Ալ Սաուդը:
«Գործողությունների համատեղ համապարփակ ծրագիրը կարող է կարևոր ներդրում լինել տարածաշրջանի անվտանգության և տնտեսական բարգավաճման ապահովման գործում, սակայն այն նաև պահանջում է [տարածաշրջանի երկրների] մասնակցություն ընդհանուր հարցերի լուծման գործում, երկկողմ հարաբերությունների համարժեք մակարդակ, զինված կազմավորումների աջակցությունից հրաժարում և, ամենակարևորը, միջուկային ծրագրից հրաժարում, որը կարող է օգտագործվել զենք ստեղծելու համար», դիվանագետի խոսքերը հաղորդում է ՏԱՍՍ-ը:
