Առաջիկա շաբաթների և ամիսների ընթացքում ԵՄ արտաքին գործերի և անվտանգության քաղաքականության գերագույն հանձնակատար Ժոզեպ Բորելը պատրաստելու է Ռուսաստանի դեմ նոր պատժամիջոցների տարբերակներ: Այս մասին նա հայտարարել է երեքշաբթի օրը Ռուսաստանի հետ հարաբերությունների վերաբերյալ իր բլոգում:
«Առաջիկա շաբաթների և ամիսների ընթացքում ես պատրաստելու եմ գործողությունների տարբեր ուղղություններ, որոնք որոշվել են ղեկավարների կողմից (ԵՄ 27 երկրների)։ Առաջին հերթին սա նշանակում է աշխատել ԵՄ-ի միասնության պահպանման համար, որը մեր ամենաուժեղ առավելությունն է Մոսկվայի հետ աշխատելիս։ Երկրորդը ՝ Եվրախորհուրդը հանձնարարել է ինձ և Եվրահանձնաժողովին ներկայացնել լրացուցիչ սահմանափակումների տարբերակներ, որոնք պետք է պատրաստ լինեն այն դեպքում, եթե Ռուսաստանը շարունակի խախտել միջազգային իրավունքը մեր անդամ երկրներում և հարևանության տարածքում», ասել է նա: Բացի դրանից, ԵՄ գագաթաժողովի հանձնարարությամբ, Բորելը առանձնացնելու է Մոսկվայի հետ փոխգործակցության հնարավոր ոլորտներ:
