«Հավերժական Հայաստան» ժողովածուն ներկայացվել է հոկտեմբերի 19-23-ը Ֆրանկֆուրտում անցկացված գրքի միջազգային ցուցահանդեսին։ Ժողովածուն ներկայացրել են Թեքեյան մշակութային միության անդամ, ՀԲԸՄ վարչության անդամ, Բուենոս Այրեսի «Սարդարապատ» պարբերականի գլխավոր խմբագիր, արգենտինահայ Սյուզաննա Տեր-Կարապետյան-Նահապետյանն ու գրքի գաղափարի ու լույս ընծայման հեղինակ Ալեքս Նահապետյանը։
«Հավերժական Հայաստան» ժողովածուի երկարությունը 70 սմ է, լայնությունը՝ 50, հաստությունը՝ 20։ Քրիստոսից առաջ 188 թվականից սկսած՝ հայ ժողովուրդն ինչ ճանապարհ է անցել, ինչ դժվարություններ է տեսել, ինչպիսի մշակույթ, ազգային հոգեւոր արժեքներ է ստեղծել, պատմական ինչ ճանապարհ է անցել, ինչպես է պայքարել, դեգերել, ինչպես է պահպանել ազգային ինքնությունը, քրիստոնեական հավատը, լեզուն, մշակույթը, այս ամենը 41 հիմնական փաստաթղթերով ներկայացված է «Հավերժական Հայաստան» ժողովածուում։ Գիրքը տպագրվել է 991 օրինակով։ Ուսումնասիրվել են Հայաստանի, Ռուսաստանի, ԱՄՆ-ի, Իտալիայի, Մեծ Բրիտանիայի ու այլ երկրների ավելի քան 20 արխիվները, մանրամասնորեն հետազոտվել են Հայաստանին ու հայ ժողովրդին առնչվող փաստաթղթեր, որոնց ընտրությունն ու մեկնաբանությունը վստահվել են հայոց պատմության երկու մասնագետի։ Նրանցից մեկը հին ու միջին դարերի մասնագետ, Սորբոնի համալսարանից Ջուսթո Թրաինան է, մյուսը՝ Ալդո Ֆերարին՝ հայ ժամանակակից պատմության մասնագետ՝ Վենետիկի համալսարանից։ Նրանց օգնել են եւս երկու դոկտոր-պատմաբան՝ Իտալիայից։ Նրանցից Պաոլո Լուկան 2019 թվականին եկել է Երեւան՝ մի քանի փաստաթղթերի հետ կապված որոշ հարցերով դիմել Մատենադարանին։
«Հավերժական Հայաստան» գրքի պատրաստմանն Ալեքս Նահապետյանին մեծապես օգնել է Միգել Հուգեդը։ Գրքի փաստաթղթերն ուսումնասիրողներից մեկն էլ պատմաբան Ինմակոլատա Էրամոն է։
Ժողովածուի մի մասը ներկայացնում է հայ ժողովրդի քաղաքական զարգացման պատմությունը՝ սկսած Մեծ Հայքի անկախ թագավորության հիմնադրումից՝ Ք.ա. 188 թ., մինչեւ 1400 թվական՝ Լենկթեմուրի ներխուժումը՝ Կովկաս։ Փաստաթղթերի կեսը գրաբարով է, մյուս մասը՝ հին հունարեն, լատիներեն, միջնադարյան ֆրանսերեն։ 21 փաստաթուղթ, որ քարտեզներ են, գրքեր, գրված են գրաբար, ժամանակակից հայերեն, նաեւ՝ ռուսերեն, ֆրանսերեն, օսմաներեն։ Դրանք թվագրված են 16-րդ դարից մինչեւ մեր ժամանակներ։
Բոլոր 41 փաստաթղթերը՝ բնօրինակի չափսերով, տեսքով ու գործածված նյութի բացարձակ նմանությամբ են պատրաստվել ու հավաքվել գրքում։ Եթե բնօրինակը մետաքս է, ուրեմն պատրաստվել է ճիշտ նույն փաստաթուղթը՝ մետաքսից, մագաղաթ է՝ մագաղաթից։ Աղոթագրքի էջը քայքայվել-ծակվել է, ուրեմն կրկնօրինակը պատրաստվել է նույնությամբ։
Սյուզաննա Տեր-Կարապետյան-Նահապետյանը Ֆրանկֆուրտից Azg.am-ին հայտնեց, որ օտարազգի շատ այցելուներ են հետաքրքրվել «Հավերժական Հայաստան» գրքով։ Բոլորը հիացմունք ու զարմանք են ապրել՝ տեսնելով գրքի ավանդական, դասական օրինակից խիստ տարբեր, իր բովանդակությամբ ու տեսքով չափազանց գրավիչ «Հավերժական Հայաստանը», որի վրա դրոշմված է Հայաստանի Հանրապետության զինանշանը։
«Աշխարհի 100 երկրների գրահրատարակությունները ներկայացնող բազմաթիվ տաղավարների ընտրանու մեջ «Հավերժական Հայաստանն» իր տեսակով ու չափսերով եզակի էր։ Ես և որդիս մանրակրկիտ ներկայացրինք օտարազգիներին, թե որքան կարևոր տեղեկություններ է պարունակում գիրքը Հայաստանի պատմության մասին՝ 41 փաստաթղթեր, որոնք հայ ժողովրդի անցած ճանապարհի ապացույցներ են։ Շատերին զարմանք պատճառեցին այդ փաստաթղթերը։
Մեր տաղավարը Հայաստանի ազգային տաղավարի դիմացն էր։ Ամբողջ ընթացքում Հայաստանի ներկայացուցիչների հետ ջերմ հարաբերությունների մեջ ենք եղել։ Երբ ցուցահանդեսն ավարտվեց, ու ստիպված էինք բաժանվել, Հայաստանի պատվիրակության ներկայացուցիչներից մեկն ինձ ասաց՝ շնորհակալություն, որ մեզ վերադարձրիք հայ զգալու պատիվը։ Վահան Թեքեյանի խոսքերը մենք Արգենտինայում հաճախ ենք օգտագործում։ Ինձ համար չափազանց հաճելի էր այդ բառերը լսել Հայաստանի հայերից։
Ես ու որդիս այնքան դրական հույզեր ստացանք, որ լցվեցինք հավատով՝ մի օր «Հավերժական Հայաստանում» զետեղված պատմություններն իմանալու են աշխարհի բոլոր ծագերում, բոլորը պետք է իմանան Հայաստանի, հայ ժողովրդի անցած դառը, բայց հավերժական ճանապարհի մասին»,-Ֆրանկֆուրտից Azg.am-ին պատմեց տիկին Սյուզաննան։
