Տարիներ առաջ ստեղծված հայկական շարֆերի «Արտույտ» բրենդի հիմնական գաղափարը հայկական արվեստը ճանաչելի դարձնելն է: Իրողությունները ցույց են տալիս՝ հիմնադիրներին դա հաջողվեց, ավելին՝ հայկական արվեստը նաև միջազգային ասպարեզում է ճանաչելի դառնում այդ թվում նաև իրենց շնորհիվ:
Այդպես, Միլանի նորաձևության շաբաթվա շրջանակում «Արտույտ»-ը ներկայացավ «Փարաջանով 100» նոր հավաքածուով, որն արժանացավ ամենաբարձր գնահատականի: Եվ ահա հավաքածուն առաջին անգամ կներկայացվի նաև Հայաստանի ազգային պատկերասրահում՝ նոյեմբերի 15-ին։
Նոյեմբերի 8-ին լրագրողների հետ հանդիպմանն «Արտույտ» ընկերության հիմնադիր-տնօրեն Արևիկ Առաքելյանն ասաց՝ Սերգեյ Փարաջանովի թանգարանի հետ համագործակցում են շուրջ յոթ տարի։ «Ի սկզբանե ունեցել ենք մետաքսե շարֆերի հավաքածու՝ Փարաջանովի կոլաժների հիման վրա։ Այս տարի Փարաջանովի 100-ամյակին ընդառաջ ՀՀ ԿԳՄՍ նախարարությունը հայտարարել էր մրցույթ։ Մենք ևս մասնակցեցինք մրցույթին։ Ընկերությունը 2017-ից տարին երկու անգամ մասնակցում է Միլանի նորաձևության շաբաթներին, ուստի որոշեցինք այնտեղ ներկայացնել Փարաջանովին նվիրված հագուստների և նոր շարֆերի հավաքածուն, կազմակերպել կինոդիտում՝ փարաջանովյան օր նվիրելով Միլանին»,-պատմեց Առաքելյանն ու հավելեց՝ երկօրյա միջոցառմանը ցուցադրվել է Փարաջանովի «Հակոբ Հովնաթանյան» կարճամետրաժ ֆիլմը, անցկացվել է դասախոսություն։ Այդ ամենը համակարգել է «Ոսկե ծիրան» կինոփառատոնի գեղարվեստական տնօրեն Կարեն Ավետիսյանը։
Ցուցադրությունը տեղի է ունեցել Միլանի Բագատի Վալսեկի թանգարանում։Արևիկ Առաքելյանն ասում է, որ ցուցադրության վայրը պատահական չի ընտրվել։
«Միլանի Բագատի Վալսեկի թանգարանը ձևավորվել է երկու եղբայրների՝ Բարոն Ֆաուստոյի և Ջուզեպպե Բագատի Վարսեկի կողմից, ովքեր 19 -րդ դարի իրենց ընտանեկան տունը նեոռենեսանս ոճով վերակառուցել են Միլանի կենտրոնում, կահավորել են 15-16- րդ դարի իտալական հավաքածուներով։ Իսկ մենք ընտրել էինք Փարաջանովի ավելի շատ ռենեսանսի ոճը, այդ իսկ պատճառով ընտրեցինք այդ թանգարանը»։
Միլանի միջոցառմանն անդրադարձել էին մի շարք հեղինակավոր լրատվամիջոցներ, Փարաջանովի մասին պատմող նյութերը տեղ են գտել գլխավոր էջերում։ «Պատասխանատվությունդ ավելի է մեծանում, երբ երկիր ես ներկայացնում, իսկ արձագանքերից հասկանալի է դառնում, որ նման համաշխարհային գիգանտին ներկայացնելը Հայաստանի մշակութային հաղթանակն է»,- ասում է Արևիկ Առաքելյանը։
Փարաջանովը զարմացրել է իտալացիներին։ Միջոցառումից հետո տարբեր համադրողներ, արվեստագետներ «Արտույտ»-ին շնորհակալություն են հայտնել ցուցադրության համար՝ նշելով, որ ցուցադրության շնորհիվ ավելի լավ են ճանաչել Փարաջանովին, նրա արվեստը։ Եղել են այցելուներ, որոնց համար Սերգեյ Փարաջանովը բացահայտում է եղել։
Emerging Talents Milano ընկերության հիմնադիր Տարիել Բիշարյանի խոսքով՝ ցուցադրության շեշտը դրել են շարֆերի վրա, իսկ զգեստները ստեղծել են ցուցադրությունը լրացնելու, Փարաջանովի արվեստն ավելի լայն ներկայացնելու նպատակով։ Հագուստները վաճառքի համար չեն, իսկ շարֆերի մի մասը Փարաջանովի կոլաժների արտատպում են, մի մասն էլ ստեղծվել է՝ ոգեշնչված Փարաջանովի արվեստից։
«Շատ ուրախ ենք, որ ցուցադրությունն այնքան հաջողված է, որ այն արդեն Երևանում ենք ներկայացնելու։ Ցուցադրությանը Իտալիայից Հայաստան է ժամանելու մեր թիմը»,-ասաց Բիշարյանն ու տեղեկացրեց, որ Միլանում նաև թվային արվեստի ցուցադրություն են կազմակերպել, որի շրջանակում ինը իտալացի և մեկ հայ նկարիչ ներկայացրել են թվային արվեստ՝ ոգեշնչված Սերգեյ Փարաջանովից։
ԿԳՄՍ փոխնախարար Դանիել Դանիելյանն էլ նշեց, որ Սերգեյ Փարաջանովի հոբելյանական միջոցառումների իրագործման համար տրամադրվել է 1 մլրդ դրամի չափով գումար. «Մենք առաջնորդվել ենք այն տրամաբանությամբ, որ կարևոր է դուրս գալ հուշ-երեկոներից ու առաջարկել նոր մոտեցումներ, թե ինչպես է այսօրվա երիտասարդը, ՀՀ քաղաքացին յուրացնում, ընկալում Փարաջանովի ժառանգությունը, »- ասաց փոխնախարարը։
Նշենք, որ Սերգեյ Փարաջանովի ծննդյան 100-ամյակն ընդգրկված է ՅՈՒՆԵՍԿՕ-ի Հռչակավոր մարդկանց և կարևոր իրադարձությունների հոբելյանների 2024-2025 թվականների օրացույցում:
Երբ ամիսներ առաջ Հայաստան են բերվել Անահիտ աստվածուհու բրոնզաձույլ արձանի գլուխն ու ձեռքը, «Արտույտ»-ը Հայաստանի պատմության թանգարանին առաջարկել է բրոնզաձույլ քանդակի պատկերով շարֆեր արտադրել։ Նրանք համաձայնություն են ստացել Բրիտանական թանգարանից և շուտով շարֆերը կներկայացնեն հանրությանը։ Շարֆի դիզայները Քրիստինե Մկրտչյանն է։ Նա «Հերմես» ապրանքանիշի նկարչուհիներից մեկն է։
