Ընդհանուր առմամբ, 2024 թվականին նախարարության աշխատանքը և մեր տնտեսական ցուցանիշները պետք է գնահատենք դրական. անցած 11 ամիսներին տնտեսության աճը կազմել է 7,4 տոկոս։ 2024 թվականի դեկտեմբեր ամսվա ցուցանիշները դեռևս որևէ կերպ ներկայացված չեն, այսօր տեղի ունեցած տարեկան ամփոփիչ ասուլիսի ժամանակ հայտարարեց Էկոնոմիկայի նախարար Գևորգ Պապոյանը։
Նախարարի խոսքով՝ հունվար-նոյեմբեր ամիսներին ունեցել ենք արտահանման 74, ներմուծման՝ 41,5 տոկոս աճ։ Արդյունաբերությունը 7,6 տոկոսով է աճել, մշակող արդյունաբերությունը՝ 10,8 տոկոս։ Ծառայությունների աճը կազմել է 6,3 տոկոս, գյուղատնտեսությունը հունվար-սեպտեմբերին աճել է 1,8 տոկոս և շինարարությունը 14,9 տոկոս աճ է գրանցել։
«Մենք ունեցել ենք նախաքովիդյան ժամանակաշրջանի տնտեսական ցուցանիշներին մոտ ցուցանիշներ։ Կարծում ենք՝ մտել ենք կայունության փուլ և նման ցուցանիշները պահպանելը բավականին բարձր ցուցանիշ է։ Տնտեսական աճի մեջ շարունակում են մեծ տեղ ունենալ ծառայությունները, բայց դրանք իրենց դերը զիջել են շինարարությանն ու արդյունաբերությանը։
Եթե 2021 թվականին պետությունը գյուղատնտեսության վրա ծախսում էր մոտ 21 միլիարդ դրամ, ապա 2023-2024 թվականներին այս ցուցանիշը կրկնապատկվել է՝ ավելի քան 40 միլիարդ դրամ»,- ասաց Պապոյանը։
Ըստ նախարարի՝ եկել է ժամանակը, որ էքստենսիվ գյուղատնտեսությունն այլևս պետության կողմից չդիտարկվի որպես գյուղատնտեսության զարգացման հիմնական միջոց։
«Կենտրոնացել ենք ինտենսիվ գյուղատնտեսության վրա: Սա շատ կարևոր է, որովհետև Հայաստանի նման պետությունը, որն ունի սահմանափակ հողային, ինչու չէ նաև ջրային ռեսուրսներ, պետք է կենտրոնանա սահմանափակ ռեսուրսներով ինտենսիվ գյուղատնտեսության վրա»,- հայտարարեց Գևորգ Պապոյանը։
