Մարդու իրավունքների պաշտպան Անահիտ Մանասյանն այսօրվա ճեպազրույցում անդրադարձավ «Ժողովուրդ» օրաթերթի լրագրողների մուտքն ԱԺ արգելելու որոշմանը։
«Հստակ նշեմ, որ Ազգային ժողովում հավատարմագրման հետ կապված հարցերը մենք դեռևս նախորդ տարվանից մեր տարեկան հաղորդման շրջանակներում ներկայացրել ենք, այդ թվում՝ «Ժողովուրդ» օրաթերթի դեպքը նկարագրելով։
Այս տարվա դեպքի հետ կապված էլ փորձում ենք հստակ իրավիճակը նայել և բացի դիմողի կողմից ներկայացված փաստարկներից՝ նաև պետական մարմնի պարզաբանումների համատեքստում քննարկել։
Բայց այստեղ մի այլ հարցադրման կուզենամ արնդրադառնալ. իրականում շատ կարևոր է, որ կառուցողական երկխոսություն ձևավորվի լրագրողների և պետական իշխանության ներկայացուցիչների միջև։ Շատ կարևոր է կարողանալ միմյանց հետ էթիկական սահմաններ գծել և կառուցողական լինել»,- ասաց Մանասյանը։
Հիշեցնենք, որ «Ժողովուրդ» օրաթերթի լրագրողներ Քնար Մանուկյանին և Սոնա Գրիգորյանին ԱԺ անվտանգության աշխատակիցներն օրեր առաջ դուրս էին հանել նախ ԱԺ պաշտպանության հանձնաժողովի նիստերի դահլիճից, ապա նաև Ազգային ժողովի շենքից։
Երկու լրագրողները դեռ անցած տարեվերջին էին ՔՊ խմբակցության ղեկավար Հայկ Կոնջորյանին հարց տալուց հետո զրկվել ԱԺ հավատարմագրումից. ըստ պաշտոնական պատճառաբանության՝ չթույլատրված վայրում վերջինիս կամքին հակառակ հարցեր էին տվել։
