Փաշինյանի ուղերձը մեզ փոխանցեց այն փաստը, որ ինչի մասին ինքը խոսում էր՝ դա երկու մարդու որոշում էր՝ Բաքվի բռնապետ և Փաշինյան: Նստել և որոշել են մեր իրավունքների սահմանը, մեր երազանքներն ու նպատակները, այսօր Երևանի առաջին ատյանի ընդհանուր իրավասության դատարանի Շենգավիթ նստավայրում Բագրատ սրբազանի գործով դատական նիստից առաջ լրագրողներին ասաց Արցախի Հանրապետության խորհրդարանի պատգամավոր Մետաքսե Հակոբյանը:
Հակոբյանը նկատեց, որ շուրջ երկու տարում իրենք իրենց բնական իրավունքների մասին են խոսում։
«Այսինքն՝ բնական իրավունք, որը այսօր միջազգային իրավունք է, ու որևէ մեկը չի կարող դա փակել և մեր փոխարեն որոշել»:
Ըստ արցախցի պատգամավորի՝ Փաշինյանի ուղերձում կարմիր թելով նկատելի է եղել նաև շանտաժի լեզուն։
«Դրանով նաև վախեցնում էր ժողովրդի այն հատվածին, որոնք չեն լռում, որոնք խոսում են Արցախի մասին ու մտածում Արցախ վերադառնալու մասին։ Երկրի ղեկավարի կողմից ուղիղ սպառնալիք ու շանտաժ հնչեց ուղերձում, որ ով որ կխոսի՝ նախ կհետապնդվի, հետո վնաս կտա Հայաստանի Հանրապետությանը։ Սա ամենամեծ սուտն ու կեղծիքն է, քանի որ իմ բնական իրավունքի հետևից գնալը չի կարող վնասել Հայաստանի Հանրապետությանը»,- նշեց Մետաքսե Հակոբյանը:
