«Մեծ ցավով արձանագրում եմ, որ Հայաստանի Ազգային Անվտանգության Ծառայությունն, ամբողջապես, աշխատում է Ադրբեջանի շահը սպասարկելու համար: Փաստորեն, Նիկոլին հաջողվեց նաև ԱԱԾ-ն ծառայացնել իր տիրոջը՝ Ադրբեջանին, ըստ այդմ, հայ լրագրողներին այլևս արգելվում է ժողավրդին հայտնել ճշմարտությունը, իսկ ճշմարտությունն այն է, որ Փաշինյանը պատրաստվում է Սյունիքից 50 բնակավայր հանձնել Ադրբեջանին, այդ պատճառով ԱԱԾ-ն այսուհետ արգելում է լրագրողների ազատ մուտքը դեպի Սյունիքի մարզ, այլ կերպ ասած՝ բնակավայրերի Ադրբեջանին հանձնումը կկատարվի ժողովրդից թաքուն: Քիչ առաջ Հրանտ Բագրատյանը հայտնեց այն մասին, որ այցելություն է կատարել Սյունիք և պարզել 50 բնակավայրերի հանձնման մասին լուրը»,- «Փաստինֆո»-ի հետ զրույցում ասել է «Ազգային անվտանգություն» կուսակցության նախագահ Գառնիկ Իսագուլյանը` անդրադառնալով ԱԱԾ-ի կողմից տարածված հայտարարությանը:
Հիշեցնենք, որ քիչ առաջ, ի գիտություն զանգվածային լրատվամիջոցների ներկայացուցիչների, ՀՀ ԱԱԾ սահմանապահ զորքերից հայտարարություն էր տարածել, որում մասնավորապես նշված էր. «Ստեղծված օպերատիվ իրավիճակով և անվտանգության նկատառումներով պայմանավորված, ինչպես նաև հիմք ընդունելով ՀՀ Սյունիքի մարզի համապատասխան տարածքներում սահմանային աշխատանքների իրականացման հանգամանքը՝ տվյալ վայրերում տարբեր թեմաներ լուսաբանելու նպատակով անհրաժեշտ է ունենալ ՀՀ ազգային անվտանգության մարմինների համաձայնությունը, որի համար պետք է նախապես գրավոր (այդ թվում նաև էլեկտրոնային տարբերակով) դիմել ՀՀ ԱԱԾ»:
Գառնիկ Իսագուլյանը նկատում է՝ եթե մոտ ապագայում Սյունիքից 50 բնակավայր հանձնվի, լրագրողներն իրավունք չեն ունենալու, առանց ԱԱԾ-ի համապատասխան թույլտվության, բարձրաձայնել այդ մասին. «Սա նշանակում է, որ Նիկոլ Փաշինյանը պատրաստվում է հանձնել Սյունիքի բնակավայրերը, իսկ մամուլն իրավունք չունի դրա մասին խոսելու: Ես ոչ մի կերպ չեմ կարողանում հասկանալ՝ ի՞նչ օրենքի հիման վրա է ԱԱԾ-ն նման հայտարարություն անում, կամ Կառավարության ի՞նչ որոշումով է այդ հայտարարությունն ամրագրված, ինչպե՞ս կարելի է օդում նման բաներ հորինել կամ ո՞վ է ԱԱԾ-ին իրավունք տվել նման բան ասել, էլ չասեմ, որ աշխարհում նման նախադեպ, ուղղակի, գոյություն չունի, որ պետության ներսում ԱԱԾ-ն լրագրողին արգելի այս կամ այն համայնքում իր մասնագիտական պարտականությունները կատարել: Հիմա խոսքս ուղղում եմ ԱԱԾ տնօրենին՝ պարոն Աբազյան, դու Հայաստանի՞ ԱԱԾ տնօրենն ես, թե՞ Ադրբեջանի, այս հարցը շտապ կարգով պարզի քեզ համար»,- ասում է Գառնիկ Իսագուլյանը:
Այսպես շարունակվելու դեպքում, այսօրինակ ամենաթողությունը հանգեցնելու է նրան, որ վաղն ԱԱԾ-ն արգելելու է առանց իր թույլտվության մարդկանց իրենց տներից դուրս գալ, ասում է Գառնիկ Իսաագուլյանն ու հավելում ՝ Նիկոլ Փաշինյանը Հայաստանում թուրք – ադրբեջանական բռնապետության է ստեղծում. «Նիկոլը գնում է պատմության մեջ աննախադեպ, մեծագույն դավաճանության, իրեն հանցակից դարձնելով Ոստիկանությանը, Դատախազությանը, ՀՔԾ-ին, Քննչական կոմիտեին, հիմա էլ դրան միանում է Հայաստանի Հանրապետության Ազգային Անվտանգության Ծառայությանը: Ես դեռ չգիտեմ, թե ի՞նչ է այս ամենի մասին մտածում Պաշտպանության նախարարությունը: Չեմ զարմանա, եթե վաղը պարզեմ, որ մեր Պաշտպանության նախարարությունը նույնպես՝ ԱԱԾ-ի նման Ադրբեջանին է ծառայում: Էլ չեմ խոսում կորոնավիրուսի անվան տակ Արման Սարգսյանի՝ Հայաստանից դավաճանական փախուստի թեմային, չէ՞ որ Սահմանադրությամբ նախատեսված կարգով, ինքն է հանդիսանում ՀՀ տարածքային ամբողջականության գլխավոր պատասխանատուներից մեկը: Ստացվում է, որ նա փախել է Հայաստանից, թույլ տալով Նիկոլին տեղում կյանքի կոչել պետական դավաճանությանը հավասար հողերի հանձնման այս հանցագործությունները: Այս ամենին վերջ դնելու համար օր առաջ պետք է պատասխանատվության ենթարկվեն Արմեն Սարգսյանը, Նիկոլի և իր կնոջ բանդան, ինչպես նաև ՝ թրքահպատակ իշխանությունը՝ ողջ կազմով»,- ասել է «Ազգային անվտանգություն» կուսակցության նախագահ Գառնիկ Իսագուլյանը:
