Քիչ առաջ կոնյակ արտադրող ընկերությունների երկու ներկայացուցչի թույլ տվեցին մուտք գործել Հայաստանում Վրաստանի դեսպանատուն՝ ներկայացնելու իրենց պահանջները, այն է՝ վրացական սահմանին արհեստական խոչընդոտներ չստեղծել և թույլ տալ, որ հայկական կոնյակն անարգել հասնի ՌԴ և այլ երկրներ։
Ակցիայի մասնակիցներից մեկը լրագրողների հետ զրույցում կոչ արեց կոնյակ արտադրող բոլոր ընկերություններին միանալ իրենց բողոքի գործողություններին՝ փորձելու միասնական կերպով լուծում տալ հարցին։
«Եթե հարցը լուծում չգտնի, մենք այստեղից չենք գնալու, պայքարելու ենք մինչև վերջ»,- ասաց ակցիայի մասնակիցը։
Մինչ այդ՝ դեսպանատուն մուտք գործած ցուցարարները դուրս եկան, և «Պռոշյանի» կոնյակի գործարանի արտահանման մասնագետ Գայանե Պողոսյանը լրագրողների հետ զրույցում հայտնեց՝ հանդիպել են անձամբ դեսպանի հետ, ով խոստացել է, որ ամենասեղմ ժամկետներում՝ առավելագույնը տասը րոպեից կամ երկու օրից, պաշտոնական Թբիլիսին հանդես կգա անհրաժեշտ պարզաբանումներով և խնդրի լուծման առաջարկներով։
«Հստակ ժամկետներ չեն հայտնել, ասել են՝ հնարավոր է 10 րոպե, հնարավոր է՝ երկու օր։ Թե կոնկրետ ինչ հայտարարություն կլինի, նույնիսկ դեսպանատանը չգիտեն, իրենք ևս պատասխան են ակնկալում պաշտոնական Թբիլիսիից»,- ասաց Գայանե Պողոսյանը՝ նշելով, որ իրենցից կոնտակտներ են վերցրել՝ խոստանալով ճշտումներից հետո կապ հաստատել, հակառակ դեպքում իրենք կրկին բողոքի ակցիաներ կկազմակերպեն։
Դեսպանի հետ հանդիպած մյուս կոնյակագործն էլ լրագրողներին ասաց, որ ՀՀ էկենոմիկայի նախարարը և փոխնախարարն իրենց հավաստիացրել են՝ աշխատում են վրացական կողմի հետ, զբաղվում են այդ հարցով, սակայն մինչ այս պահը որևէ կոնկրետ բան իրենց չեն փոխանցել։
«Մինչև հիմա ո՛չ լուծում կա, ո՛չ որևէ բացատրություն։ Ես չգիտեմ՝ եթե ՀՀ կառավարությունն ի վիճակի լիներ, մինչև հիմա այս խնդիրը կլուծեր»,- ասաց նա։
Նշենք, որ դեպի Ռուսաստան և մերձբալթյան երկրներ Լարսով ալկոհոլային խմիչքներ արտահանող ընկերությունները վերջին մեկուկես ամսվա ընթացքում ենթարկվում են տարօրինակ ստուգումների։ Մասնավորապես, կոնյակագործները չգիտեն, թե ինչու է որոշում կայացվել Վրաստանի սահմանում լաբորատոր զննության ենթարկել հայկական արտադրության կոնյակը։
