Վարդագույն ակնոց, կարծում եմ, ոչ ոքի աչքերին չկա։ Իհարկե, պետությունը բավարար ջանքեր պետք է գործադրի, որպեսզի կանխարգելի հանցագործությունները։ Կառավարության նիստից հետո լրագրողների հետ զրույցում այս մասին ասաց Արդարադատության նախարար Սրբուհի Գալյանը։
«Եվ նաև մենք մշակում ենք առանձին ռազմավարություն, որն ուղղված է հենց հանցավորության թվերի նվազմանը և հանցագործությունների կանխարգելմանը։ Այդ առումով խնդիրը միայն դրված չէ իրավապահ մարմիների կամ ոլորտում քաղաքականություն մշակող մարմնին առջև, այլ խնդիրը շատ ընդհանուր է։ Եվ խնդրի լուծման պատասխանատուն յուրաքանչյուր քաղաքացի է, շատ լայն սպեկտորի քաղաքացիներն են նաև պատասխանատուները՝ սկսած մեր երեխաների կրթությունից։ Այսինքն՝ սա երկար պրոցես է։
Քաղաքացին խնդիր չունի իրեն անվտանգ չզգալու, որովհետև մինչ այս պահը համատարած հանցագործությունների վերաբերյալ որևէ տվյալ չենք ունեցել, իսկ առանձին դեպքեր եղել են և կան»,- հավելեց նա։
Հարցին՝ պաշտոնանկություններ կլինե՞ն, Սրբուհի Գալյանը պատասխանեց՝ քանի որ Փարաքարի համայնքապետի սպանության դեպքի առնչությամբ իրենք որևէ մանրամասի չեն տիրապետում, հետևություններ չեն կարող անել, հետևաբար չի կարող ասել՝ պաշտոննակություններ կլինեն, թե ոչ։
Դիտարկմանը, որ Նիկոլ Փաշինյանը կարծես արդեն հետևություններ է արել, Գալյանը պատասխանեց՝ շատ լավ է արել, իսկ ինքը չի կարող անել։
Լրագրողների մյուս դիտարկմանը, որ վտանգավոր հանցագործներն ազատության մեջ են, նախարարը պատասխանեց՝ սպանության մեջ բազամաթիվ մեղադրվողներ այժմ կրում են կալանք խափանման միջոցը տարբեր քրեակատարողական հիմնարկներում։
«Բայց կարող է լինել իրավիճակ, երբ կապ չունի հանցանքի ծանրությունը, նույնիսկ սպանության մեջ մեղադրվող անձը կրի խափանման այլ միջոց։ Այսինքն՝ դատարանը որոշի, որ պետք է այլ խափանման միջոց նշանակի տվյալ անձի նկատմամբ, որովհետև խափանման միջոցի տեսակի հիմքում ոչ թե հանցագործության ծանրությունն է, այլ մի շարք այլ հանգամանքներ»,- ասաց նա։
Միաժամանակ Սրբուհի Գալյանը տեղեկացրեց՝ այս պահին տնային կալանքի մեջ է գտնվում 900 անձ, իսկ 1600-ից ավելի անձ էլ՝ կալանքի տակ։
