Գեղարքունիքի մարզի Գեղամասար համայնքի բնակավայրերի ուղղությամբ իրավիճակն այս պահին որոշակիորեն հանդարտվել է: Այս մասին NEWS.am-ի հետ զրույցում հայտնել է Գեղամասար խոշորացված համայնքի ղեկավար Հակոբ Ավետյանը:
«Հակառակորդը կրակել է Սոթք, Կութ, Ազատ, Նորաբակ գյուղերի ուղղությամբ, բնակիչները ԱԹՍ-ներ են նաև նկատել երկնքում, բայց այս պահին համեմատաբար հանգիստ է»,- նշել է համայնքապետը:
ՀՀ մարդու իրավունքների պաշտպանը քիչ առաջ հայտնել էր, որ ադրբեջանական զորքերը ինտենսիվ և թիրախային կրակում են Գեղարքունիքի մարզի Կութ և Նորաբակ գյուղերի վրա, որոնց բնակիչները փորձում են պատսպարվել:
Ըստ Արման Թաթոյանի՝ ադրբեջանական զինուժը կրակ է բացել նաև Սոթքի լեռնանցքի ուղղությամբ:
