Ընդդիմությունը երկար ժամանակ գերատեսչությունների ղեկավարներին հրավիրում էր ԱԺ՝ սահմանի շուրջ ստեղծված մտահոգիչ հարցերի շուրջ պարզաբանումներ ստանալու: Շուրջ երկու ամիս ԱԺ ղեկավարությունը և գործադիրը չէին կարողանում քննարկումը կազմակերպել, ստիպված հրատապ հարցով մենք քննարկում կազմակերպեցինք: Այս մասին խորհրդարանական ճեպազրույցի ժամանակ ասաց «Հայաստան» խմբակցության ղեկավար Սեյրան Օհանյանը և նշեց, որ ընդդիմությունը հանդիպման արդյունքներից գոհ չէր, քանի որ գերատեսչությունների ներկայացուցիչներն ամբողջական տեղեկության չէին տիրապետում.
«Մենք եկանք այն եզրակացության, որ այդպիսի հրատապ քննարկման շրջանակներում լավ կլիներ, որ գերատեսչությունների առաջին դեմքերը ներկայանան, քանի որ ներկայացված անձինք լիարժեք չէին տիրապետում իրավիճակին՝ հատկապես ռազմաքաղաքական խնդիրներին»,-ասաց Օհանյանը:
Սեյրան Օհանյանը նշեց նաև, որ «Հայաստան» և «Պատիվ ունեմ» խմբակցությունները համտեղ հայտարարություն էին ընդունել, որտեղ հստակ մեսիջներ կային Արցախի ինքնորոշման և այն մտահոգությունների մասին, որ ապագայում հնարավոր է փաստաթղթեր ստորագրվեն, սակայն իշխող «Քաղաքացիական պայմանգիրը» չմասնակցեց քվեարկությանը, ուստի հայտարարությունը չընդունվեց.
«Հայտարարության մեջ նշված էր, որ առանց համապատասխան ընթացակարգերի, Ազգային ժողովի և ժողովրդի չեն կարող ստորագրվել»,-ասաց նա:
Ամփոփելով ԱԺ նախորդ քառօրյան՝ Սեյրան Օհանյանն ասաց, որ նախորդ շաբաթ ձևավորվել է «Հայաստան» հիմնադրամի հավաքագրած գումարի օգտագործման միջոցներն ուսումնասիրող քննիչ հանձնաժողովը, հաստատվեց հանձնաժողովի կազմը՝ Արծվիկ Մինասյանի գլխավորությամբ, իսկ երկրորդը հանձնաժոցովը՝ Արդար դատաքննությունը խոչընդոտող փաստերը ուսումնասիրելու նպատակով ստեղծված ԱԺ քննիչ հանձնաժողով է, որը իրավունքի ուժով ձևավորվել է, սակայն ՔՊ-ն մերժել է հանձնաժողովի կազմի հաստատումը:
Աղբյուր` Փաստինֆո
