ԱԺ փոխխոսնակ Ռուբեն Ռուբինյանը չի բացառում, որ հայ-թուրքական հարաբերությունների կարգավորումն ավելի շուտ դրական հանգրվանի կհասնի, քան հայ-ադրբեջանական կարգավորումը:
«Իհարկե, տեսնում եմ նման հնարավորություն: Ես չեմ ասում, որ այդպես կլինի, անգամ չեմ ասում, որ լավատես եմ կամ լավատես չեմ»,- ԱԺ-ում լրագրողների հետ զրույցում ասաց նա:
Ռուբեն Ռուբինյանն միաժամանակ աբսուրդ համարեց ընդդիմադիրների պնդումները, թե Հայաստանը գնում է թուրքացման ճանապարհով, և թուրքական մեծ տնտեսությունը ժամանակի հետ կկլանի հայկական տնտեսությունը։
«Եթե ընդդիմության հիպոթեզը հետևյալն է, որ Թուրքիան ուզում է կլանել, վերացնել Հայաստանը, և եթե ընդդիմության երկրորդ հիպոթեզը հետևյալն է, որ եթե Թուրքիան բացի սահմանը, ապա Թուրքիան կկլանի Հայաստանը: Հարց. ինչո՞ւ Թուրքիան մինչ օրս չի բացել սահմանը»,- նկատեց ԱԺ փոխխոսնակը:
Ռուբեն Ռուբինյանը նաև շեշտեց՝ ՀՀ իշխանությունն իր բոլոր հարևաններին և գործընկերներին ներկայացրել է «Խաղաղության խաչմերուկ» նախագիծը, որում արտացոլված է տարածաշրջանում բոլոր կոմունիկացիաների ապաշրջափակման տեսլականը և պատրաստակամությունը:
«Ես պատճառ չեմ տեսնում, թե ինչու պետք է մեր որևէ հարեւան չողջունի այդ նախագիծը: Թուրքիան, կարծում եմ, պիտի որ դրական վերաբերվի տարածաշրջանային կոմունիկացիաների ապաշրջափակմանը, որովհետև դա օգտակար կլինի բոլորի, այդ թվում՝ Թուրքիայի համար»,- ամփոփեց Ռուբինյանը:
