Երևան քաղաքի ընդհանուր իրավասության դատարանը, դատավոր Դ․ Արղամանյանի նախագահությամբ, փոխեց հասարակական-քաղաքական գործիչ Ռուբեն Հակոբյանի խափանման միջոց կալանքը. նրա նկատմամբ կիրառվեց բացակայելու արգելք։
Նա ազատ արձակվեց նիստերի դահլիճից։
Դատավորն ասաց, որ ստացել են պաշտպանության կողմի ներկայացված փաստաթղթերը, նաև մեղադրյալի բժշկական փաստաթղթերը, և դատարանը որոշել է խափանման միջոցը կալանքը վերացնել ու ազատ արձակվել դատական նիստերի դահլիճից։
Ավելի վաղ նրա պաշտպաններից Գրիգոր Մեղդեսյանը միջնորդեց դադարեցնել քրեական հետապնդումը, կարճել վարույթը։ Նրա խոսքով, մեղադրյալի նկատմամբ սկսված հանրային քրեական հետապնդումը ենթակա է դադարեցման, քրեական գործով վարույթը ենթակա է մերժման այն հիմքով, որ վարույթը նախաձեռնվել է Քրեական դատավարության օրենսգրքով չնախատեսված աղբյուրից ստացված տեղեկության հիման վրա։
Խորհրդակցական սենյակից վերադառնալով՝ դատավորը հայտնեց, որ դատարանը մերժում է Ռուբեն Հակոբյանի քրեական հետապնդումը դադարեցնելու, վարույթը կարճելու մասին միջնորդությունը։
Հիշեցնենք, որ 70-ամյա Ռուբեն Հակոբյանը մեղադրվում է «իշխանությունը զավթելուն ուղղված հրապարակային կոչեր անելու» միջին ծանրության հանցանքի մեջ։ Նրա նկատմամբ որպես խափանման միջոց ընտրվել է 2-ամսյա կալանքը:
