Ուկրաինայի պատերազմը ցույց տվեց առեւտրի միջոցով Ռուսաստանը փոխելու Գերմանիայի տասնամյակների մոտեցման սահմանափակ լինելը, եւ նշանակում է գլոբալիզացիայի վերջը, ինչպիսին մենք այն գիտենք, ասել է տնտեսական հարցերով եվրահանձնակատար Պաուլո Ջենտիլոնին, հաղորդում է Reuters-ը:
Ելույթ ունենալով Վաշինգտոնի Պետերսոնի ինստիտուտում՝ Ջենտիլոնին նշել է, որ ուկրաինական ճգնաժամը կփոխի նաեւ գլոբալ դաշինքները եւ լրացուցիչ ճնշում կգործադրի մատակարարումների համաշխարհային շղթաների վրա, որոնք առանց այդ էլ փխրուն են համավարակի երկու տարուց հետո:
«Wandel durch Handel»-ի գաղափարը, այսինքն՝ առեւտրի միջոցով փոփոխությունների իրականացումը, ցույց տվեց իր սահմանափակ լինելը»,- ասել է Ջենտիլոնին՝ նկատի ունենալով Գերմանիայի քաղաքականությունը արեւելաեւրոպական երկրների նկատմամբ, որը սկսվել է 1970-ականների սկզբին: «Մենք պետք է վերաիմաստավորենք մեր հարաբերությունները ավտորիտար ռեժիմների հետ եւ ամրապնդենք մեր կապերը համախոհ գործընկերների հետ»,- ասել է նա:
«Այս ճգնաժամը վերջ կդնի նաեւ գլոբալիզացիային, ինչպիսին մենք այն գիտենք, եւ կփոխի համաշխարհային դաշինքները»,- ասել է Ջենտիլոնին: «Պատերազմը եւ դրա հետեւանքները, ներառյալ պատժամիջոցների հաջորդական փուլերը, որոնք ԵՄ-ն եւ ԱՄՆ-ը սահմանել են Ռուսաստանի հանդեպ, ուժեղացնում են ճնշումը համաշխարհային մատակարարումների առանց այն էլ ծանրաբեռնված շղթաների վրա»:
Նրա խոսքով՝ ճգնաժամը նաեւ ստիպել է Եվրամիությանը կտրուկ ավելացնել պաշտպանական ծախսերը՝ ի լրումն կլիմայի փոփոխության դեմ պայքարելու եւ տնտեսությունը թվային դարաշրջանին հարմարեցնելու համար արդեն իսկ պլանավորված խոշոր ներդրումների:
Նա նշել է, որ այդ ծախսերը, հնարավոր է, պետք է արտացոլվեն ԵՄ-ի հարկաբյուջետային կանոններում, որոնք ներկայումս վերանայվում են, եւ, հնարավոր է, որոշ նոր համատեղ փոխառություններում, որոնք հավանաբար ստեղծվել են համավարակի հետեւանքով ԵՄ-ի 800 մլրդ եվրո համատեղ պարտքի վերականգնման հիմնադրամի օրինակով:
Գերմանիան եւ Հյուսիսային Եվրոպայի մի քանի այլ երկրներ կտրականապես դեմ են նման նոր համատեղ փոխառություններին:
Ջենտիլոնին ասել է, որ ուկրաինական պատերազմի արժեքը Եվրոպայի համար կախված կլինի նրանից, թե որքան կտեւի այն, սակայն Ուկրաինային տնտեսական եւ նյութական աջակցությունը, փախստականներին օգնությունը, ինչպես նաեւ էներգիայի բարձր գների եւ արտադրության խափանումների դեմ պայքարելու համար ԵՄ տնտեսության շարունակական աջակցությունն այս տարի կավելացնի ԵՄ բյուջեի ընդհանուր դեֆիցիտը ՀՆԱ-ի առնվազն 0,6 տոկոսի չափով:
