Պատերազմի խորհրդանիշն ու ուրվականը հավակնում է Խաղաղության նոբելյան մրցանակի՞

Այսօրվա կառավարության նիստի հիմնական հարցը, մեսիջը ի լուր աշխարհի , այդ թվում նաև՝ ադրբեջանի՝ հայտարարելն էր, որ Հայաստանը հրաժարվում է եռամսյա հավաքներից։

Ընդ որում, փաշինյանի կառավարությունն այս քայլին է գնում ներկա փուլում, երբ սեփական պետությունն ու պետականությունը պաշտպանելու և ուղղակի հայության էքզիստենցիալ խնդիրն է դրված։

«Բաժանիր, որ տիրես» հայտնի տրամաբանությամբ աշխարհաքաղաքական գլոբալ խաղացողների խաչմերուկում գտնվող Հայաստանի լինել-չլինելու հարցն ահա այս կերպ է լուծում ժամ առաջ թրքահպատակություն ընդունել փափագողների այս կառավարությունը։
ՈՒշագրավն այն է, որ հենց երեկ մի տեղեկատվություն հայտնվեց լրատվամիջոցներից մեկում, ըստ որի, 2023-ի Խաղաղության նոբելյանական մրցանակակիրները ալիևն ու նաև՝ փաշինյա՞նն է լինելու։

Մասնագիտությամբ պատմաբան և պաշտպանության ոլորտին վերաբերվող իր առաջարկություններն աչքը թղթից չկտրելով ընթերցող պաշտպանական գերատեսչության ղեկավարը և վարչապետի աթոռն զբաղեցնողը եռամսյա հավաքներից հրաժարվելը փաթեթավորել էին պաշտպանության ոլորտում իրականացվող «բարեփոխումներով» /բարձր աշխատավարձ, բնակարանային պայմանների բարելավում, անվճար բուժօգնություն և այլն/, որոնց մասին արդեն 4 տարի է խոսում են, սակայն, խոստումներից զատ այլ բան դեռ չտեսանք։

Փոխարենը՝ տեսանք Արցախի պաշտպանության բանակի կազմալուծում, ՀՀ չկահավորված, վրանային և խայտառակ վիճակում գտնվող զորամասեր, այդ զորամասերում քամուց ու ցրտից սառչող նորակոչիկներ, որոնց անզեն թշնամու դեմ էր ուղարկում ներկա իշխանությունը՝ զրկելով նրանց ինքնապաշտպանության դիմելու հնարավորությունից անգամ։ Եվ ուղղակիորեն ազերիների կողմից գերեվարվելու նախադեպեր ստեղծելով։

Այդ ամենը մենք տեսել ենք, բայց տեսել ենք նաև կամավորության սկզբունքով հայրենիքը պաշտպանելու նետվող հերոսներ, տեսել ենք տարբերակված մոտեցման պայմաններում անգամ, երբ ԱԺ-ում հայտարարում և հիմնականում ընդդիմադիրներին են ներգրավում եռամսյա հավաքներին, միշտ կազմուպատրաստ այդ հավաքներին մասնակցող հայորդիներ։

Հիմա, փաստորեն, իշխանությունը քաղաքականություն է փոխում՝ եռամսյա հավաքները դարձնելով երկշաբաթյա և ընդգրկելով պահեստազորում գտնվող բոլոր քաղաքացիներին։

Կառավարության նիստի ընթացքում անպայմանորեն շեշտվեց հայկական բանակի փաշինյանական պատկերացումների մոտիվը՝ սնունդ լավ է, սննդից դժգոհող չկա։ Դե, ելակի մասին էլ չենք խոսում, մայլկա-տռուսիկն էլ, երևի մոռացավ։

Շարունակական ատեստավորումների պայմանով՝ բարձր աշխատավարձի, բնակարաններ հատկացնելու, այսինքն, դեռ իրական բարեփոխումներ չեղած՝ խոստումների ֆոնին եռամսյա հավաքները դադարեցնելու որոշումը ոչ այլ ինչ է, քան Հայաստանի բանակն ու պաշտպանության ոլորտը վերջնականապես կազմալուծելը։

Սա ալիևի ցանկության կատարումն է՝ Արցախի պաշտպանության բանակի կազմալուծումից հետո փաշինյանը վերջնականապես կազմալուծում է հայկական բանակը։ ՀՀ քաղաքացիների ուղեղները լվանալով, սին խոստումներով։ Երկիրը անպաշտպան թողնելով։ Որ հետո իր տերերին հայտարարի, տեսեք՝ Հայաստանը զինված ուժեր չունի, մենք անզեն ենք։ Ինչպես թավշյա գարշելիության ժամանակ էր բաց ափերն օդում ի տես իրեն ֆինանսավորողների պարզում։

Պատերազմի խորհրդանիշն ու ուրվականը հավակնում է Խաղաղության նոբելյան մրցանակի՞․․․

Աղբյուր` Փաստինֆո