Մեր ցանկացած գործողություն պետք է բխի օրենքից. օրենքներում մենք չունենք այդպիսի հիմք, որպեսզի անձին աշխատանքից ազատենք կամ լիազորությունները կասեցնենք իր տղայի կամ իր ազգականի կատարած այս կամ այն հանցանքով պայմանավորված, այսօր լրագրողների հետ զրույցում նշեց ԱՆ քրեակատարողական ծառայության պետ Ծովինար Թադևոսյանը՝ անդրադառնալով հայտնի աղմկահարույց տեսանյութին, որտեղ մի խումբ դեռահասներ ծեծի են ենթարկում իրենց հասակակցին, և նրանցից մեկը «Արթիկ» ՔԿՀ պետի տեղակալ Ռուբեն Գասպարյանի որդին է։
«Մենք քրեակատարողական հիմնարկներում ունենք 2845 ազատությունից զրկված անձ. եթե մենք այս տեսանկյունից ենք փորձում նայել երևույթներին, ուրեմն պետք է բոլոր այդ անձանց ծնողներին գտնենք, դարձնենք թիրախ և պահանջ ներկայացնենք այդ անձանց աշխատանքից ազատելու»,–ասաց նա։
Նա միաժամանակ իր փորձով կիսվեց, ըստ որի ՔԿՀ-ներում վերջին տարիներին անչափահասների թիվը նվազագույնն է եղել։
«Անցած տարիանգամ ունեցել ենք դեպք, որ անչափահաս ազատությունից զրկված անձ չենք ունեցել։ Այս պահին մենք ունենք ազատությունից զրկված 6 անչափահաս։ Այս անչափահասները սովորաբար հայտնվում են քրեակատարողական հիմնարկներում ամենածանր հանցանքների դեպքում, այսինքն մնացած դեպքերում պետությունը որդեգրել է այնպիսի քաղաքականություն, որ այս անձինք չհայտնվեն ՔԿՀ-ներում և, այսպես ասած, կրկնակի հանցածին իրավիճակում չհայտնվեն։ Դա շատ լավ է և որը որ տվել է իր արդյունքները։ Մենք ունենք 5 անչափահաս, որոնք իրականացրել էին այդ ծեծը, և իրենցից 4–ը կալանավորվել էր։ Մենք այս վերջին վերջին վեց-յոթ տարիներին չենք ունենա այնպիսի դեպք, որ անչափահասը կալանավորվում է ծեծի հոդվածով։ Այսինքն՝ սա նաև աննախադեպ էր այս տեսանկյունից։
Այնպես չի, որ մեզ համար նորություն է, որ մեր հասարակության մեջ՝ հատկապես դեռահաս երեխաների շրջանում լինում են ծեծի դեպքեր։
Մեր հասարակությունն, ընդհանուր առմամբ, հատկապես տղաների շրջանում բռնություն քարոզող հասարակություն է։ Այսինքն՝ տղան մեծանում է, տղային ասում են, երբ որ մեկը քեզ բան է ասում, քարը վերցրու տուր գլխին, ու երեխաներին սովորեցնում են ավելի շատ բռնություն, քան առողջ հարաբերություններ և առողջ կոմունիկացիա։
Մենք հաստատ կունենանք շատ-շատ դեպքեր, երբ դա չի տեսանկարահանվել, համացանց չի գցվել, և այդ դեպքերը անհայտ են մնացել։
Իմ ասածն այն է, որ պետք չի թիրախավորել։ Ես նաև ուզում եմ, որ երեխաներին էլ չթիրախավորենք՝ քրեական ենթամշակույթ տերմինը իրենց վրա կպցնելով։ Եթե մենք ծեծով հարց լուծելու երևույթի անունը դնենք քրեական ենթամշակույթ, կստացվի, որ մեր հասարակության մեծ մասը կրում է քրեական ենթամշակույթ»,–ասաց Ծովինար Թադևոսյանը։
Նա միաժամանակ հավաստիացրեց, որ որդու վարքի առնչությամբ խոսել է «Արթիկ» ՔԿՀ պետի տեղակալի հետ, սայան չցանկացավ մանրամասնել, թե ինչ։
