Ուկրաինայի իշխանությունները ճնշում են գործադրում ԱՄՆ-ի վրա, որպեսզի թույլտվություն ստանա ATACMS հրթիռներով հարձակումներ իրականացնել ռուսական տարածքների վրա։
ՏԱՍՍ-ին հղումով՝ Associated Press-ը հայտնում է, որ ուկրաինացի պաշտոնյաները պնդում են, որ Ռուսաստանի խորքերում գտնվող օդանավակայաններին հարվածելու թույլտվություն ստանան։ Ուկրաինայի զինված ուժերի ներկայացուցիչները գործակալության հետ զրույցում հայտարարել են, որ առանց համապատասխան թույլտվության, իրենց «ձեռքերը կապված են»։
ԱՄՆ պետքարտուղար Էնթոնի Բլինքենը մայիսի 31-ին հաստատել է՝ նախագահ Ջո Բայդենը համաձայնել է, որ ԱՄՆ-ն ռազմական հարվածներ հասցնի Ռուսաստանի տարածքում։ Բլինքենը հավելել է, որ խոսքը միայն Խարկովի մոտ գտնվող Ռուսաստանի տարածքների մասին է։ Միաժամանակ նա չի բացառել, որ ռուսական տարածքի վրա ամերիկյան զենքի հարձակումների շրջանակը կավելանա։
Գերմանիայի նախարարների կաբինետը հայտարարել է, որ գերմանական զենքը կարող է օգտագործվել Խարկովի մարզում Ռուսաստանի կողմից «հարձակումներից պաշտպանվելու համար»։ Սակայն ներկայումս իրենց զենքի կիրառման սահմանափակումների հարցում արևմտյան երկրների միջև միասնականություն չկա։
Ռուսաստանի նախագահ Վլադիմիր Պուտինը մայիսի 28-ին նշել է, որ ժամանակակից հարվածային համակարգերի թիրախային հարձակումները կատարվում են հեռահար կամ ավտոմատ կերպով «առանց ուկրաինացի զինվորականների ներկայության»: Դա անում են նրանք, ովքեր այդպիսի համակարգեր են արտադրում և մատակարարում Ուկրաինային. ընդգծել է Պուտինը։ Նա զգուշացրել է, որ ՆԱՏՕ-ի երկրները պետք է «իմանան, որ կրակի հետ են խաղում»։ Ռուսաստանի Անվտանգության խորհրդի փոխնախագահ Դմիտրի Մեդվեդևը մայիսի 31-ին ասել է, որ Ուկրաինա մատակարարվող հեռահար զենքերն արդեն «ուղղակիորեն վերահսկվում են ՆԱՏՕ-ի երկրների զինվորականների կողմից», և նման գործողությունները կարող են պատասխան հարվածների պատճառ դառնալ։
Ինչպես մայիսի 31-ին գրել է The Wall Street Journal-ը, ԱՄՆ վարչակազմը աշխարհագրորեն սահմանափակել է ամերիկյան զենքի օգտագործումը Ռուսաստանի դեմ, որպեսզի Ուկրաինայում հակամարտությունը չվերաճի Վաշինգտոնի և Մոսկվայի միջև ուղիղ բախման։ Ըստ այդ տվյալների՝ ԱՄՆ-ը հավանություն է տվել GMLRS հրթիռների, HIMARS բազմակի հրթիռային համակարգերի և հրետանային համակարգերի կիրառմանը հրամանատարական կետերում, զենքի պահեստներում և Ռուսաստանի տարածքում գտնվող այլ օբյեկտներում, որոնք օգտագործվում են Խարկովի ուղղությամբ հարձակում իրականացնելու համար: Միևնույն ժամանակ, ամերիկյան իշխանություններն արգելել են ավելի հեռահար ATACMS հրթիռների օգտագործումը Ռուսաստանի տարածքները հարվածելու համար։
Հետևեք մեզ նաև Տելեգրամում։
