Ի՞նչ խաղաղության պայմանագիր, եթե կողմերն իրար չեն ճանաչում։ Ու՞մ հետ ենք խաղաղության պայմանագիր ստորագրում, Ադրբեջանը մեր սահմանները չի ճանաչում։ Այս մասին այսօր Ազատության հրապարակում հանրահավաքի ժամանակ լրագրողների հետ զրույցում ասում է ՀՀ նախկին վարչապետ, «Միասին» շարժման համահիմնադիր Հրանտ Բագրատյանը։
Նա, մասնավորապես, նշում է. «Պայմանագիրը ստորագրելուց հետո ասելու ենք՝ դե եկե՛ք հիմա սահմանները որոշենք, ու Ադրբեջանը նորից հարձակվելու է։ Չէ՞ որ խաղաղության պայմանագիրն Ադրբեջանին չի պարտավորեցնում ճանաչել ՀՀ սահմանները, միայն հայկական կողմն է ճանաչում Ադրբեջանի սահմանները։ Դա դառնալու է պատերազմի պայմանագիր։ Ու՞մ է պետք այդ պայմանագիրը, ինչու՞ ենք ստորագրում։ Փաշինյանը շուտով գնալու է, հաջորդ իշխանությանն է կրակը գցելու, չեն իմանալու ինչ անել»:
Բագրատյանը կոչ է անում քաղաքացիներին մասնակցել «Միասին» շարժման կազմակերպված հավաքներին և պահանջել Նիկոլ Փաշինյանի հրաժարականը։ Նա առաջիկայում պատրասվում է քննարկում կազմակերպել ընդդիմադիր ուժերի հետ։
«Նման քննարկումներն ընդդիմադիր դաշտի ուժերին սովորեցնում են միասին աշխատել։ Ես բոլորին հիշեցնում եմ, որ փորձանք է գալիս՝ «Խաղաղության պայմանագիր» անվամբ։ Պայմանագրի ստորագրումից 10-15 օր հետո ուզենալու ենք գնալ Մեղրի, ադրբեջացիները կանգնեցնելու են, ասեն՝ սպասիր, մենք գնանք, հետո կհասկանանք՝ ձեզ թողնում ենք, թե ոչ»,– ասում է Բագրատյանը: