Գերմանացի կենսաբանների նոր հետազոտությունը ցույց է տվել, որ թեյի մեկ փաթեթի մեջ կարելի է գտնել հարյուրավոր տեսակի միջատների գենետիկական հետքեր։ Սակայն շտապենք զգուշացնել, որ գիտնականների խնդիրը բոլորովին էլ թեյի «աղտոտվածությունը» ցույց տալը չէր։ Գիտնականները վերլուծել են այսպես կոչված «միջավայրային» ԴՆԹ-ն (environmental DNA, eDNA), որի հետքերն առկա են սովորական թեյի փաթեթներում։ Նրանց հաջողվել է գտնել միջատների ընդհանուր առմամբ հազարավոր տեսակների գեներ, իսկ թեյի յուրաքանչյուր առանձին փաթեթի մեջ՝ մինչև չորս հարյուր։
eDNA-ն կարող է առանձնացվել միջավայրի մի շարք օբյեկտներից և նույնիսկ օդից։ Այն ծառայում է որպես հարմար գործիք տեղական էկոհամակարգերի մոնիտորինգի համար: Որպեսզի միջատի ԴՆԹ-ն մնա տերևի վրա, երբեմն բավական է, որ միջատը պարզապես կրծի այն։ ԴՆԹ-ի մոլեկուլը արագորեն քայքայվում է բաց արևի տակ ուլտրամանուշակագույն ճառագայթներից և հեշտությամբ լվացվում ջրով, սակայն թեյի մանրացված չորացող տերևները կարող են երկար ժամանակ պահել այն, նույնիսկ մինչև այն պահը, երբ այդ ԴՆԹ-ն հայտնվի սպառողի բաժակում: Հավելենք, որ սա վերաբերում է թեյերի այն տեսակներին, որոնք չեն ենթարկվում ջերմային մշակման։
Ավելին` սկզբնաղբյուրում:
