Ոստիկանները Ոսկեպարի եկեղեցու մոտ պատ են կազմել, որպեսզի տավուշցիները չմոտենան ու չկանխեն ականազերծման աշխատանքը

ՀՀ Տավուշի մարզի Ոսկեպար բնակավայրի Սուրբ Աստվածածին եկեղեցուն հարակից տարածքում լարված իրավիճակ է։ Ոստիկաններն ու ԱԱԾ հատուկջոկատայինները թույլ չեն տալիս, որ քաղաքացիները մոտենան եկեղեցուն։

Սակրավորները սկսել են ականազերծել եկեղեցուն կից տարածքը, որպեսզի այն հանձնվի Ադրբեջանին։

Այս պահին ոստիկանները պատ են կազմել։ Քաղաքացիներից մեկը դիմեց Տավուշի ոստիկանապետ Արթուր Մկրտչյանին ու հարցրեց, թե ինչու են իրենց խանգարում.  «Դու էլ ես հայ, ես էլ եմ հայ, տալի՞ս ես։ Դու իմ հարցին չես կարողանում պատասխանել, ասում ես` ծառայություն եմ իրականացնում»,–ասաց նա։

Երբ հոգևորականներից մեկը մոտեցավ ԱԱԾ հատուկջոկատայիններին, նրան էլ թույլ չտվեցին անցնել, բնակիչները սկսեցին ճեղքել ոստիկանների կազմած պատը։

«Այս պահին մի գնացեք, դուք գնալու եք, բախում է լինելու։ Ռազմական ոստիկանությունը ծառայություն է անում, հիմա կվերջացնի կգնաք 2 ժամից։ Համբերե՛ք, երբ ճանապարհը բացվի կգնաք»,- ասաց փոխոստիկանապետ Կարեն Հակոբյանը։