Ոստիկանությունը թույլատրել է Փարաքարի ավագանու անդամ, ընտրված համայնքապետ Վոլոդյա Գրիգորյանին մտնել համայնքապետարանի շենք և անցնել իր լիազորությունների կատարմանը: Վոլոդյա Գրիգորյանը «Ապրելու երկիր» կուսակցությունից է։
Նշենք, որ Վոլոդյա Գրիգորյանին և նրա աջակիցներին այսօր մի քանի ժամ թույլ չեն տվել մտնել համայնքապետարան։
Փարաքար համայնքի բնակիչներն առավոտից փակել էին Զվարթնոց տանող ճանապարհը, և պահանջում էին թույլ տալ իրենց մտնել համայնքապետարանի շենք։
Փարաքար համայնքում այսօր նախատեսված էր համայնքապետի երդմնակալության արարողությունը, սակայն ոստիկանությունը փակել է համայնքապետարանի մուտքը: «Ապրելու երկիր» կուսակցությունը, որը համարում է, որ իր թեկնածու Վոլոդյա Գրիգորյանն ընտրվել է համայնքապետ, դրսում՝ մշակույթի տան դիմաց, ամբիոն է տեղադրել և կազմակերպել երդմնակալության արարողությունը:
Ընտրությունների արդյունքների վերաբերյալ կա դատական վեճ, այդ պատճառով էլ ոստիկաններնիրավունք չեն ունեցել նրանց թույլատրել համայնքապետարանի շենք մտնել։
Փարաքար խոշորացված համայնքում անցկացված ընտրությունների արդյունքում 10 մանդատ ստացել է «Ապրելու երկիր» կուսակցությունը, 9 մանդատ՝ «Դավիթ Մինասյան» դաշինքը, իսկ 2-ը՝ «Քաղաքացիական պայմանագիրը»։
Սկզբում համայնքապետի պաշտոնի համար առաջադրվել է «Ապրելու երկիր» կուսակցության թեկնածու Վոլոդյա Գրիգորյանը. նա ընտրվել է 10 ձայնով:
Հետո եկել են Դավիթ Մանուկյանի թեկնածությունը պաշտպանող ավագանու անդամները եւ Դավիթ Մինասյանին համայնքապետ են ընտրել 11 ձայնով, որը 50 տոկոսից ավելի է:
