Տրանսպորտից օգտվող և մեքենաներով տեղաշարժվող քաղաքացիների շահերը երբեմն, այո՛, հակասում են, բայց ապագայի պլաններում ունենք նոր ճանապարհների կառուցում, լրագրողների հետ զրույցում այսօր ասաց Երևանի ավագանու անդամ Անի Խաչատրյանը։
«Չկա մայրաքաղաք, որը չունենա խցանումներ։ Վերջերս պաշտոնական այցով Փարիզում էինք և տեսնում էինք, թե ինչքան ճանապարհ են քաղաքակիրթ երկրները տալիս հասարակական տրանսպորտին կամ հեծանիվներին. տալիս էին ավելի շատ տեղ, քան մեքենաներին։ Այս պահի դրությամբ Երևանի ճանապարհները թույլ չեն տալիս ունենալ լիարժեք ազատում խցանումներից։
Տարոն Մարգարյանի ժամանակվանից ունենք տրանսպորտային ցանցի մեխանիզմ։ Դեռ այդ նախագծով էլ գնում է, և այդ նախագծի շրջանակներում գծվում են թե՛ կանգառները, թե՛ մնացածը։ Դա լավագույն բանն է, որ նախկիններն արել են։ Այն, ինչ հիմա արվում է, սկսել ենք զրոյից։ Այո՛, երբեմն այդ ճանապարհին կլինեն նաև խոչընդոտներ։
Մենք մարդկանց կյանքը չենք բարդացնում։ Շուտով կլսեք նաև տրանսպորտից օգտվող քաղաքացիների օրհնանքները»,- ասաց Անի Խաչատրյանը։
