Մանկուց այս փողոցով անցնելիս ինձ մոտ միշտ մշակութային շոկ է առաջացել՝ ինչպես կարող է КГБ-ի հարևանությամբ լինել ազատության պոետի, նշանավոր հեղափոխականի՝ Միքայել Նալբանդյանի արձանը, այսօր ԱԱԾ-ի շենքի մոտ քարոզարշավի ժամանակ հայտարարեց «Լուսավոր Հայաստան» կուսակցության պատգամավորի թեկնածու Կարպիս Փաշոյանը։
«Տպավորությունն այնպիսին է, որ նույնիսկ քարացած հեղափոխականին այս շենքը հսկում է։ Բոլորը խոսում են, որ Հայաստանն ուզում է դառնալ եվրոպական պետություն, բայց առանց ազատության գաղափարի, КГБ-ի պադվալով Հայաստանը չի կարող ունենալ եվրոպական ապագա։
Երբ 2018-ի հեղափոխությունը եղավ, մենք մտածում էինք, որ այս կառույցներն այլևս չենք անվանի ուժային կառույցներ, որովհետև դրանք ասոցացվում են բիրտ ուժի հետ, այլ կանվանենք իրավապահ մարմիններ։ Բայց այդպես էլ Նիկոլ Փաշինյանի օրոք այս կառույցները չդադարեցին լինել ուժային կառույցներ, և այդպես էլ չդարձան իրավապահ մարմիններ, որովհետև սկսեցին ծառայել Փաշինյանի անձի և պաշտանմունքի համար։ Հանուն Փաշինյանի՝ սկսեցին սատանաներ որսալ, անմեղ մարդկանց, եպիսկոպոսների լցնել բանտերը։ Այս տրամաբանությամբ մենք չենք կարող հասնել Եվրոպա»,- ասաց Կարպիս Փաշոյանը։
Ամենամեծ հարվածն, ըստ նրա, որ հասցրել է Նիկոլ Փաշինյանը, այն է, որ ինչ-որ պահի ԱԱԾ-ն սկսեց հանուն Փաշինյանի քաղաքական շահի՝ գաղտնի փաստաթղթեր հրապարակել։
«Սա ուղիղ հարված է մեր պետականության սյուներին, այս կառույցն է պաշտպանում մեզ արտաքին և ներքին մարտահրավերներից, և այս կառույցն արդյունավետ գործունեության համար պետք է ունենա լրտեսական, գործակալական ցանց։ Սակայն հանուն Հայաստանի՝ այլևս ոչ ոք չի ցանկանա այս կառույցի հետ համագործակցել, որովհետև ինչ-որ մի օր խելահեղ առաջնորդի քմահաճույքով մամուլի, ինչ-որ մեկի փեսայի ձեռքերում կհայտնվեն գաղտնի փաստաթղթեր։ Նիկոլ Փաշինյանն է պատասխանատու, որ այստեղից թղթեր են դուրս եկել»,-ամփոփեց Փաշոյանը։
