Այս պահին կարելի է քննարկել ադրբեջանական պատվիրակության երևանյան այցի երկու հիպոթեզ՝ առաջինն անվտանգային խնդիրներն են. ըստ ՀՀ իշխանությունների՝ այցը հայ հասարակությունից գաղտնի է պահվել՝ անվտանգային նկատառումներից ելնելով։ Երկրորդ հիպոթեզն այն է, որ հատկապես արտաքին քաղաքականության մասով հաշվետվողականության տոտալ բացակայությունը գործող իշխանությունների համար դարձել է բավական ընդգծված ձեռագիր։ Azg.am-ի թղթակցի հետ զրույցում այս մասին ասաց քաղաքագետ Արա Պողոսյանը՝ անդրադառնալով Ադրբեջանի փոխվարչապետ Շահին Մուստաֆաևի գլխավորած պատվիրակության այցին։
«Հաստատվում է Նիկոլ Փաշինյանի այն հայտարարությունը, որ պետությո՛ւնն էլ է ինքը, ժողովո՛ւրդն էլ է ինքը, ԱԳ նախարա՛րն էլ է ինքը, դատավո՛րն էլ, դատախա՛զն էլ, Սահմանադրական դատարա՛նն էլ։ Հետևաբար որևէ մեկին հաշվետվություն ներկայացնելու կարիք և ցանկություն իշխանությունները կարծես թե չունեն։
Եթե խոսքն առաջին՝ անվտանգային հիպոթեզի մասին է, ապա այն վկայում է ավելի խորքային խնդիրների մասին։ Եթե ՀՀ իշխանությունները համարում են, որ կա անվտանգային այնպիսի ռիսկ, որ ադրբեջանական պատվիրակության այցը գաղտնի պահվի, ապա դա նշանակում է, որ խաղաղությունը ֆեյք է, և այդ օրակարգը բացառապես վերաբերում է Հայաստանի և Ադրբեջանի իշխող էլիտաներին, այսինքն՝ սա պայմանավորվածություն է երկու երկրների քաղաքական էլիտաների միջև, և այստեղ չկա որևէ ժողովրդական հենք։ Անվտանգային ռիսկեր կան այն երկրներում, որտեղ կան չհանգուցալուծված՝ սառը կամ տաք փուլում գտնվող կոնֆլիկտներ։
Իսկ մյուս հիպոթեզը, որ ՀՀ իշխանություններն անհրաժեշտություն չեն տեսնում ժողովրդին ինչ-որ բան ասել, սա արդեն այլ բանի մասին է խոսում. սա խոսում է երկրի տոտալ ավտորիտարիզացման մասին, որտեղ հաշվետվողականությունը փոխակերպվում է երկաթե մանդատի թափահարմամբ։ Երկու դեպքում էլ խոսքը պետության դեֆորմացիայի և հանրային վերահսկողության ապալեգիտիմացման մասին է, ինչը Հայաստանի նման երկրի համար կարող է չափազանց բարձր գին արժենալ»,- ասաց Արա Պողոսյանը։
Անդրադառնալով ադրբեջանական պատվիրակության այցի հնարավոր նպատակին՝ քաղաքագետը հիշեցրեց՝ քանի որ Շահին Մուստաֆաևը զբաղվում է լոգիստիկ, հայ-ադրբեջանական սահմանային խնդիրներով և զբաղեցնում է Ադրբեջանի և Հայաստանի միջև պետական սահմանի սահմանազատման պետական հանձնաժողովի նախագահի պաշտոնը, կարելի է ակնկալել, որ այցի ընթացքում հենց այս բնույթի խնդիրներ են քննարկվելու։
Մեր զրուցակիցը միաժամանակ հիշեցրեց՝ երեկ Թուրքիայում տեղի է ունեցել Գյումրի-Կարս երկաթգծի վերականգնման և գործարկման՝ Հայաստան-Թուրքիա համատեղ աշխատանքային խմբի հանդիպումը։
«Կարծում եմ՝ այս պարագայում սա ընդհանուր շղթայի մասն է և մեծապես վերաբերվում է լոգիստիկ խնդիրներին՝ հատկապես երկաթուղուն, և այս հանդիպումների համընկնումը պատահական չէ։ Հետևապես հակված եմ, որ խնդիրներից գոնե մեկը վերաբերում է երկաթուղու հնարավոր ապաշրջափակմանը»,- ամփոփեց մեր զրուցակիցը։
Հիշեցնենք, որ ՀՀ ԱԳՆ-ից հաստատել էին՝ Հայաստան է ժամանել Ադրբեջանի պատվիրակությունը՝ փոխվարչապետ Շահին Մուստաֆաևի գլխավորությամբ:
Պետական գերատեսչությունից միաժամանակ նշել էին՝ կտրվի լրացուցիչ մամուլի հաղորդագրություն։
Նշենք, որ այս պահի դրությամբ ԱԳՆ-ն այցի օրակարգը չի հրապարակել։ Հայտնի է միայն, որ ադրբեջանական պատվիրակությունն այս պահին Աղվերանում է։
