Եթե ՀՀ իշխանությունները հնարավորություն ունենային, ընդհանրապես գաղտնի կպահեին Ադրբեջանի փոխվարչապետ Շահին Մուստաֆաևի գլխավորած պատվիրակության՝ Հայաստան կատարած այցը։ Azg.am-ի թղթակցի հետ զրույցում նման տեսակետ հայտնեց քաղաքագետ Արմեն Բաղդասարյանը՝ անդրադառնալով այն հանգամանքին, որ ՀՀ իշխանությունները նախապես չեն հայտարարել այս այցի մասին, և հայաստանյան հասարակությունն Մուստաֆաևի գլխավորած պատվիրակության այցի մասին առաջինը տեղեկացել է ադրբեջանական աղբյուրներից։
«Նախընտրական այս շրջանում ՀՀ իշխանություններին ձեռնտու չէ նման այցը հրապարակելը, և դա կապված է այցի հավանական նպատակների հետ։ Կարծում եմ՝ օգտվելով այն հանգամանքից, որ Հայաստանը նախընտրական փուլում է, և իշխանությունները բավականին խոցելի են, ադրբեջանական կողմը շտապում է փաստաթղթավորել իր հետագա պահանջները, արդեն կոնկրետ հավաստիացումներ ստանալ՝ ընդ որում գուցե նույնիսկ վերջնագրային տեսքով, հակառակ դեպքում սահմանին որևէ կրակոց կպայթեցնի խաղաղության փուչիկը և շատ լուրջ հարված կհասցնի ՀՀ իշխանություններին։
Դրա համար էլ օգտվելով այս խոցելի վիճակից՝ ադրբեջանցիները եկել են շտապեցնելու Հայաստանին, որպեսզի ստանան այն, ինչի մասին բազմիցս խոսել են։ Ընդ որում՝ չեմ կարծում, թե քննարկման հիմնական թեման կլինի սահմանագծման-սահմանազատման գործընթացն այնպես, ինչպես մենք ենք ցանկանում, որովհետև կարծում եմ՝ Ադրբեջանում համարում են, որ այդ հարցն արդեն լուծել են՝ անգամ անկլավների հարցը»,- ասաց քաղաքագետը։
Ըստ Արմեն Բաղդասարյանի՝ ադրբեջանական պատվիրակությունը Երևան ժամանել է ՀՀ իշխանություններին շտապեցնելու Նախիջևանի հետ անխոչընդոտ կապի ապահովման հարցում կամ քննարկելու պահեստային մյուս տարբերակները։
«Սա ուղղակի ենթադրություն է, որ եթե TRIPP-ը Մեղրիի հետվածով չիրականանա, միևնույն է՝ դրանից Ադրբեջանի նպատակները չեն փոխվելու, և գուցե քննարկեն Նախիջևանի հետ պահեստային տարբերակներ, օրինակ՝ Սիսիանով։ Կարծում եմ՝այս հարցերն են եկել քննարկելու և պահանջելու, որ ՀՀ իշխանություններն իրենց այս խոցելի իրավիճակում ավելի հիմնավոր և անշրջելի համաձայնություն տան։ Գուցե նույնիսկ փաստաթղթեր ստորագրվեն, որոնք, ենթադրում եմ, ՀՀ իշխանությունները չեն էլ հրապարակի։
Իհարկե, իշխանությունները կփորձեն սա ներկայացնել որպես ևս մեկ քայլ խաղաղության ճանապարհին, բայց ակնհայտորեն այստեղ շատ ավելի լուրջ հարցեր կան, որոնց մասին, մեծ հավանականությամբ, կիմանանք միայն հունիսի 7-ից հետո, եթե, իհարկե, ՀՀ իշխանությունները վերարտադրվեն»,- ասաց Արմեն Բաղդասարյանը։
Քաղաքագետի խոսքով՝ ադրբեջանական կողմն այս պահին, ամենայն հավանականությամբ, մտավախություն չունի, որ ՀՀ գործող իշխանություններն առաջիկա ընտրություններում չեն վերարտադրվի։
«Կարծում եմ՝ Ադրբեջանի իշխանությունները նման մտավախություն ունեին սրանից մեկ-երկու ամիս առաջ, դրա համար էլ այն ժամանակ ավելի բացահայտ կերպով էին աջակցում ՀՀ իշխանություններին, ասում էին, որ Հայաստանին հնարավորությույն են տալիս, բայց հիմա, կարծում եմ, ադրբեջանական կողմի մտավախությունը մասնակիորեն փարատվել է, որովհետև Հայաստանում ընդդիմությանը չհաջողվեց միասնական ճակատով հանդես գալ, ինչն էլ Էապես մեծացնում է գործող իշխանությունների վերարտադրման հավանականությունը»,- ամփոփեց մեր զրուցակիցը։
Հիշեցնենք, որ համացանցում Մուստաֆաևի գլխավորած պատվիրակության ինքնաթիռի լուսանկարների տարածումից հետո ՀՀ ԱԳՆ-ից հաստատել էին՝ Հայաստան է ժամանել Ադրբեջանի պատվիրակությունը՝ փոխվարչապետ Շահին Մուստաֆաևի գլխավորությամբ:
Պետական գերատեսչությունից միաժամանակ նշել էին՝ կտրվի լրացուցիչ մամուլի հաղորդագրություն։
Նշենք, որ այս պահի դրությամբ ԱԳՆ-ն այցի օրակարգը չի հրապարակել։ Հայտնի է միայն, որ ադրբեջանական պատվիրակությունն այս պահին Աղվերանում է։
