Մոսկվայի երկնքում հակաօդային պաշտպանության համակարգերը խոցել են ավելի քան 10 ԱԹՍ:
Մերձմոսկվայի նահանգապետ Անդրեյ Վորոբյովը հայտնել է. «Այսօր առավոտյան Մոսկվայի որոշ շրջանների բնակիչներ պայթյունների ձայներ են լսել. դա մեր ՀՕՊ համակարգի աշխատանքն էր: Դեպի Մոսկվա թռիչքի ժամանակ խոցվել են մի քանի ԱԹՍ-ներ: Բնակիչներին խնդրում ենք պահպանել հանգստություն: Արտակարգ բոլոր ծառայություններն աշխատում են, տեղեկատվության տրամադրումը կշարունակենք»։
Մոսկվայի քաղաքապետ Սերգեյ Սոբյանինն էլ հայտնել է, որ ԱԹՍ-ների հարվածից որոշ շինություններ աննշան վնասներ են կրել. քաղաքի արտակարգ ծառայությունները դեպքի վայրում են, պարզում են կատարվածի հանգամանքները:
Սոբյանինը հայտնել է, որ այս պահի դրությամբ որևէ մեկը լրջորեն չի տուժել:
Իշխանությունների տվյալներով՝ ոչ ոք հոսպիտալացման կարիք չի ունեցել, անօդաչու սարքերի հարվածած տների մի քանի մուտքերի բնակիչները տարհանվել են։ Երկու հոգի դիմել է բժշկական օգնության, սակայն ոչ ոք հոսպիտալացման կարիք չի ունեցել։
Երեքշաբթի վաղ առավոտյան ՏԱՍՍ-ին ԱԻՆ մայրաքաղաքի գլխավոր շտաբի մամուլի ծառայությունից հայտնել են, որ վարչության աշխատակիցները հետաքննում են։ Հրդեհի հետքեր չեն հայտնաբերվել։ Ականատեսների վկայությամբ՝ դեպքի պահին պայթյունի ձայն է լսվել։
ՏԱՍՍ-ի փոխանցմամբ՝ շենքերի շուրջն անօդաչու թռչող սարքի բեկորներ են հայտնաբերվել։ Երեք հարկերի պատուհանները կոտրվել են։
Մոսկվայում արգելափակվել է Ուդալցովա փողոցի երթևեկությունը՝ Լենինի պողոտայից մինչև Միխայիլ Պևցով փողոց. հաղորդում է քաղաքի Տրանսպորտի և զարգացման վարչությունը:
«Դոմոդեդովո», «Վնուկովո» և «Ժուկովսկի» օդանավակայաններն աշխատում են բնականոն հունով. ՏԱՍՍ-ին հայտնել են օդանավակայանների ներկայացուցիչները։
