Մշակույթի գործիչներն այսօր Երևանից ուղևորվել են Կիրանց, սակայն ոստիկանները փակել են գյուղ տանող ճանապարհը և նրանց նույնպես չեն թողնում առաջ գնալ։
«Ինչքան որ դուք չեք հասկանում, թե ինչ է կատարվում, այնքան էլ` ես։ Այս ճանապարհը կարծես հենց մեզ համար փակված լինի։ Մենք մի խումբ մշակութային գործիչներով եկել ենք Կիրանց Լենա տատիկին շնորհավորելու, մեր զորակցությունը հայտնելու կիրանցեցիներին, բայց փակել են… հիմա սպասում ենք բացեն, որ գնանք»,– ասաց երգիչ Արսեն Գրիգորյանը լրագրողների հետ զրույցում։
Ինչպես արդեն տեղեկացրել ենք, ոստիկաններն ավելի վաղ են փակել Կիրանցի ճանապարհը և թույլ են տալիս գյուղ մտնել միայն կիրանցեցիներին։ ԱԺ ընդդիմադիր պատգամավորների մուտքը նույնպես արգելել են։
Ոստիկանության արգելքից հետո «Հայաստան» խմբակցության պատգամավորներ Մհեր Սահակյանը, Արման Ղազարյանը, Ագնեսա Խամոյանն ու Արմենուհի Կյուրեղյանը որոշեցին շրջանցել ոստիկանական պատնեշը ու գյուղ հասնել հարակից բլրով։
