Որևէ բյուրոկրատական քաշքշուկ չկա և չի կարող լինել, եթե հարցը վերաբերում է անձի առողջությանը: Ընդամենը պետք է անձը դիմում ներկայացնի, այդ դիմումը կքննարկվի, կներկայացվի համապատասխան պատասխանը, և կձեռնարկվեն այն միջոցները, որն անհրաժեշտ է այդ անձի առողջության պահպանման համար: Այս մասին այսօր լրագրողների հետ զրույցում հավաստիացրեց Արդարադատության նախարար Սրբուհի Գալյանը՝անդրադառնալով պատգամավոր Գառնիկ Դանիելյանի այն հայտարարությանը, որ Միքայել Սրբազանին անհապաղ վիրահատություն է անհրաժեշտ:
«Այն դիմումը, որը պետք է ներկայացվի, չի ներկայացվել: Ես հանձնարարել եմ, որ եթե իր փաստաբանները տեղյակ չեն՝ ինչպես պետք է ներկայացվի համապատասխան դիմումը, մեր իրավաբանն այսօր կմոտենա իրեն և համապատասխան դիմումը կներկայացնի անհրաժեշտ ՊՈԱԿ-ին»,-ասաց Գալյանը:
Դիտարկմանը, թե այս գործընթացը բյուրոկրատական քաշքշուկի է նմանվում, նախարարը չհամաձայնեցա՝ իր հերթին հավելելով.
«Սա նմանվում է այն իրավիճակին, երբ որ փաստաբանները արգելված իր էին մուտք արել քրեակատարողական հիմնարկ. իրենց հետ տարել էին իր, որը իրականում արգելված չէ, բայց արել էին դա սահմանված կարգի խախտմամբ։ Հիմա մեր պետությունում, եթե գործում է օրենսդրություն, կա նաև սահմանված կարգ, և հատկապես, եթե հարաբերությունների մեջ փաստաբաններն են, ապա պարտադիր է, որպեսզի այդ սահման փաստաբանները պահպանեն սահմանված կարգը։ Եթե խնդիր ունեն սահմանված կարգի պահպանման, մենք իրենց իհարկե կուղղորդենք։
Որևէ ծայրահեղ առողջական խնդիր այս պահին առկա չէ՝ հատկապես արձանագրված։ Ես խոսում եմ փաստերի մասին։ Ես այն մարդն եմ, ով գիտի, պետք է իմանա այն ամենը, ինչ կապված է այդ ոլորտի և այնտեղ պահվող անձանց հետ։
Այսօր խափանման միջոց կրող անձին կմոտենա համապատասխան իրավաբան, որը քրեակատարողական ծառայության իրավաբանն է և կպարզաբանի իրավունքը և նաև կխնդրի դիմում ներկայացնել մեր գործընկերներին դա փոխանցելու նպատակով։
Ես աբսուրդային եմ համարում նման մանիպուլյացիոն ձևակերպումներ պարունակող հայտարարությունները»,- նշեց Գալյանը։
