«Ժողովրդավարության հայկական ֆորումը» լավ առիթ է քննարկելու Հայաստանում ժողովրդավարության ու ժողովրդավարական բարեփոխումների առաջընթացը, այն մարտահրավերները, որ գոյություն ունեն ՀՀ-ում ժողովրդավարության ու ժողովրդավարական բարեփոխումների զարգացման համար. «Ժողովրդավարության հայկական ֆորումի» ժամանակ ասել է ՀՀ վարչապետ Նիկոլ Փաշինյանը:
«Այս ֆորումը պետք է արձանագրի բոլորիս հավաքական կամքը, ամրացնի ու զարգացնի ժողովրդավարությունը ՀՀ-ում: Դրա համար պետք է արձանագրենք, թե ինչ է տեղի ունեցել ժողովրդավարության այն օրակարգի հետ, որ մենք ունեցել ենք 7 տարի առաջ: Ընտրությունների կեղծիք արտահայտությունը կարծում եմ արդեն վերագրված է պատմական ժանրին:
Օրինակ, երբ որևէ ճանապարհ տասնյակ տարիներ կիսավեր վիճակում է ու հանկարծ ադ ճանապարհը հիմնանորոգվում է, դա մարդկանց համար նորություն է ընդամենը 1 շաբաթ, մեկ շաբաթից հետո այն արդեն առօրեականանում է, ու դրանով ոչ ոքի չես զարմացնի կամ ուրախացնի: Մեկ այլ մարտահրավեր, որ քննարկում էինք 7-8 տարի առաջ, հավաքների ազատության կամ որոշակի տեղերի սահմանափակումն է քաղաքական ուժերի կամ քաղհասարակության համար: Ներկաներից շատերը հիշում են, որ տեղեր կային, ընդհուպ բացօթյա, որտեղ հանրահավաք անելը հեշտ չէր, եթե չասենք անհնարին»,- ասաց Փաշինյանը:
Նա խոսել է նաև մամուլի ազատության մասին:
«Սա նույնպես մի թեմա է, որը ՀՀ-ում արդեն անցյալում է: Խոսքի և մամուլի ազատությունը հանրության կողմից պետք է ընկալվի ոչ թե որպես «ցնցոտիավոր ջադու», այլ որպես՝ վայելչատես այցելու: Արձանագրումը, որ արել եմ դեռևս 2018 թվականին, շարունակում է մնալ անսասան:
Ժողովրդավարությունը մեզ համար հանգամանքների բերում չէ, այլ ռազմավարություն և կառավարությունը շարունակելու է այս ռազմավարական ուղեգիծը: Մի բան հստակ է՝ Հայաստանում ժողովրդավարությունը արմատավորված է և միջազգային հանրությունը Հայաստանը ընկալում է որպես գլոբալ ժողովրդավարության մաս»,- ասաց նա:
