Քաթարում ընթացող Ֆուտբոլի աշխարհի առաջնությունն ավարտվեց Արգենտինայի հաղթանակով։ Արգենտինան Ֆրանսիային հաղթեց հետխաղյա 11 մետրանոցներով՝ 4։2 հաշվով։ Ֆրանսիայի հավաքականը հայրենիք կվերադառնա արծաթե մեդալով՝ փոխչեմպիոնի տիտղոսով։
Ֆրանսիայի հավաքականի հարձակվող Կիլիան Մբապեն ճանաչվեց Ֆուտբոլի աշխարհի 2022 թ. առաջնության լավագույն ռմբարկու։
23-ամյա Մբապեն դարձավ ԱԱ-2022-ի «Ոսկե խաղակոշիկի» մրցանակակիրը: Արգենտինայի դեմ եզրափակիչ խաղում նա հեթ-տրիկի հեղինակ դարձավ՝ մրցաշարում գոլերի թիվը հասցնելով 8-ի։
Արգենտինայի հավաքականը երրորդ անգամ դարձավ աշխարհի առաջնության հաղթող: Ավելի վաղ արգենտինացիները հաղթել են 1978 և 1986 թվականներին։ Ֆրանսիացիներն աշխարհի չեմպիոն են դարձել 1998 և 2018 թվականներին։
21-ամյա արգենտինացի կիսապաշտպան Էնցո Ֆերնանդեսը ճանաչվեց ԱԱ-2022-ի լավագույն երիտասարդ խաղացող։ Ընթացիկ մրցաշարի յոթ խաղում ֆուտբոլիստը դարձել է մեկ գոլի և մեկ գոլային փոխանցման հեղինակ։
Արգենտինայի հավաքականի ավագ Լիոնել Մեսսին ճանաչվեց առաջնության լավագույն ֆուտբոլիստ, Արգենտինայի դարպասապահ Էմիլիանո Մարտինեսը՝ լավագույն դարպասապահ: Մարտինեսն աշխարհի առաջնությունից առաջ հարցազրույցում ասել է, որ Արգենտինայի հավաքականի քաշող ուժն 99,9 տոկոսով Մեսսին է, իսկ խմբի մյուս ֆուտբոլիստները լրացնելու են այն փոքրիկ մասը, ինչը Մեսսիին չի հաջողվի։
Շատերն էին սպասում, որ Լիոնել Մեսսիի՝ երկար տարիների չարչարանքը վերջապես հաջողությամբ կպսակվի, ու նա ձեռքը կվերցնի Աշխարհի առաջնության չեմպինոի գավաթը։
Ֆրանսիայի հավաքականը առաջնության խմբային փուլում 4:1 հաշվով հաղթել է Ավստրալիային, 2:1 հաշվով՝ Դանիային, 0:1 հաշվով զիջել է Թունիսին, 1/8 եզրափակիչում 3:1 հաշվով հաղթել է Լեհաստանին, քառորդ եզրափակիչում՝ 2:1 հաշվով Անգլիային, կիսաեզրափակիչում՝ 2:0 հաշվով Մարոկկոյի ընտրանուն:
Ֆրանսիա-Արգենտինա եզրափակիչ խաղին Քաթարի մարզադաշտից հետևում էր Ֆրանսիայի նախագահ Էմանուել Մակրոնը։ Նա անձամբ արծաթե մեդալները հանձնեց իր երկրի հավաքականի ֆուտբոլիստներին։
Մարզական մեկնաբանների կարծիքով՝ բավականին երկար ժամանակ Աշխարհի առաջնությունում Ֆրանսիա-Արգենտինա թիմերի մրցակցության նման դրամատիկ պայքարով խաղ չէր եղել։
