Խորհրդարանն արտահերթ նիստում առաջին ընթերցմամբ ընդունեց «Իմ քայլը» խմբակցության պատգամավորներ Սիսակ Գաբրիելյանի, Բաբկեն Թունյանի, Ալեն Սիմոնյանի և Կարեն Համբարձումյանի հեղինակած Հարկային օրենսգրքում փոփոխություններ կատարելու նախագիծը: Նախագիծը ներկայացնող Սիսակ Գաբրիելյանի խոսքով` դեռևս 2017 թվականին Սյունիքի համայնքապետերից մեկը դիմել է վարչապետ Կարեն Կարապետյանին և խնդրել հարկային արտոնություն սահմանել իր համայնքում գործարար միջավայրը բարելավելու համար: Ըստ պատգամավորի` ընդունված օրենքն առաջին հայացքից դրական է, սակայն իրականում այն վերաբերում է մենաշնորհի խրախուսմանը:
«Խոսքը վերաբերում է սրան` Մեղրիի անցակետից մինչև 1 կմ հեռավորության վրա գտնվող պահեստի առկայության դեպքում, եթե մեքենաները գալիս են Իրանի Իսլամական Հանրապետությունից, ազատվում են ճանապարհային հարկի վճարումից»,- ասաց Գաբրիելյանը:
Նրա խոսքով` դեռևս 2004 թվականից այդ հեռավորության վրա մեկ մաքսակետ է գործում և նույնիսկ ֆիզիկապես հնարավոր չէ երկրորդ պահեստը կառուցել:
Քաղաքական մեծամասնության պատգամավորի պնդմամբ` պահեստի սեփականատերը համայանքապետի կինն է: 2019-ին ԻԻՀ-ից պահեստ մուտք գործած մեքենաների 70 տոկոսը, ըստ պատգամավորի, այդ ընտանիքին պատկանող բիզնեսն է:
Այժմ պատգամավորներն առաջարկում են հանել այդ արտոնությունը, որպեսզի մյուս տնտեսվարողները կարողանան այնտեղ պահեստ բացել:
Անկախ պատգամավոր Թագուհի Թովմասյանը հետաքրքրվեց, թե ինչու է իշխանությունը նոր հիշել այս խնդրի մասին` հատկապես սյունիքյան հայտնի դեպքերից հետո այն կարծես թե քաղաքական նպատակ է հետապնդում: Գաբրիելյանն արձագանքեց` նախագիծը շրջանառության մեջ է դրվել մեկ ամիս առաջ:
Գաբրիելյանը հավանաբար նկատի ուներ Մեղրի խոշորացված համայնքի ղեկավար Մխիթար Զաքարյանին, որը նախկինում Ագարակ համայնքի ղեկավարն էր: Վերջինս Փաշինյանի`Սյունիք այցից հետո ձերբակալվել էր խուլիգանության կասկածանքով:
Հետք
