Գերմանիայում, եվրոպական տարբեր քաղաքներում արդեն մի քանի օր է, ինչ բողոքի ակցիաներ են տեղի ունենում՝ ի աջակցություն Բաքվում գտնվող հայազգի պատանդառված անձանց, Արցախի հանրապետության ռազմաքաղաքական ղեկավարության։
Այսօր ակցիա է տեղի ունեցել նաեւ Բեռլինում Ադրբեջանի դեսպանատան դիմաց՝ պատանդառված անձանց ազատ արձակելու պահանջով։ Գերմանահայոց կենտրոնական խորհրդի ատենապետ Յոնաթան Շպանգենբերգը «Փաստինֆո»-ին հայտնեց, որ այս շարժումն իրականացնում են տարբեր խմբերով՝ Մարդու իրավունքների միջազգային ընկերակցություն (IGFM), Գերմանիայի ACAT կազմակերպություն (Action by Christians for the Abolition of Torture- Խոշտանգումների վերացմանն ուղղված քրիստոնյաների գործողություն), Գերմանահայոց կենտրոնական խորհուրդը, որի ատենապետն է ինքը և մի քանի այլ կազմակերպություններ։
«Ճիշտ է, մարտի 10-ին տեղի ունեցած ակցիային կային հայեր, բավական շատ գերմանացիներ, մոտավորապես 50 հոգի էինք, բայց դա չէ հարցը, մեր նպատակն արթնացնելն է»,- նշեց մեր զրուցակիցը:
Նրա փոխանցմամբ՝ ԵՄ-ի, ԱՄՆ-ի, Ֆրանսիայի դեսպանատներ նամակներ են փոխանցել։
«Մեր նպատակներից մեկն էլ այն է, որ ուրիշները ևս խանդավառվեն, նույնիսկ 5 հոգանոց, փոքրիկ ակցիաներ լինեն աշխարհի տարբեր ծայրերում, դա իր ազդեցությունը պետք է ունենա հարցը նորից օրակարգ բելու համար»,- ասաց Յոնաթան Շպանգենբերգը՝ ավելացնելով, որ այդ ուղղությամբ ակտիվ աշխատանք է տարվում նաեւ գերմանական քաղաքական դաշտում:
«Ինձ համար շատ ավելի ցավոտ է հարցը, քանի որ ինքս Արցախում եղել եմ , գերեվարված անձանցից մեկին ծանոթ եմ, միշտ սրտիս մեջ է ինքը։ Խայտառակություն եմ համարում, մեծ ողբերգություն է այժմյան հայաստանյան իշխանության պահվածքը, բայց դրան վերջ կգա», – ասաց Յոնաթան Շպանգենբերգը:
Աղբյուր` Փաստինֆո
