Ոստիկանությունում բռնության ենթարկված քաղաքացի Սերգեյ Աբրահամյանն այսօր մանրամասներ ներկայացրեց իր հետ կատարված դեպքից։
Նա պատմեց, որ համապատասխան ծանուցում ստանալուց հետո ներկայացել է ոստիկանություն, որտեղ, սակայն, հերթապահ ոստիկանը տեղեկացրել է, որ իրեն չեն ընդունելու։
«Ես անմիջապես զանգեցի ՄԻՊ։ Դրանից հետո գնացել եմ տուն։ Հաջորդ օրը՝ ժամը 10։30-ի սահմաններում, կինս արթնացրեց ինձ, հեռախոսը տվեց, ասաց, որ ոստիկանությունից են զանգում։ Խոսեցի, վեր կացա, ոստիկաններին ներս հրավիրեցի։ Այդ ընթացքում ոստիկաններից մեկն անընդհատ դուրս էր գալիս, խոսում հեռախոսով, նորից ներս գալիս։
Սուրճը խմեցի, մոտեցա, ասեցի՝ խմեք, դուրս գանք։ Այդ ընթացքում մի խումբ ոստիկաններ ներս են մտել, ուժ կիրառել, պառկացրել գետնին, որ ձեռնաշղթա անցկացնեն։ Այդ ժամանակ բռնություն կիրառեցին, ձեռքերս կանդալեցին, տարան ոստիկանություն, ոտքերս էլ կանդալեցին, լայն սկոչով բերանս կապեցին և քացիներով սկսեցին հարվածել։ Փսխեցի, պաշտոնավորներից մեկը նկատեց, որ խեղդվում եմ, քթիս միջնապատն էլ ջարդված է, չէի կարողանում քթով լիարժեք շնչեի, հրահանգեց, որ չհարվածեն։ Ասեց՝ «Մեռավ, մնաց վրեքներս, չխփեք»։
Սկոչը քանդեցին, գցեցին աղբամանի մեջ։ Մինչև երեկոյան ժամը 4-5-ը պահել են, հետո տարել քննչական բաժին։ Կնոջս ոստիկանության դիմաց ասեցի, որ զանգի ՄԻՊ, շտապօգնություն ուղարկեն, որ կանչը գրանցվի։ Բայց շտապօգնություն չի եկել, տարել են քննչական բաժին։ Ես գրառում կատարեցի, որ շտապօգնություն կանչեն, դուրս եկավ, եկավ, ասեց՝ գնա, ձեր տնից շտապօգնություն կկանչես։ Դուրս եկա, տաքսի նստեցի։ Նույնիսկ զուգարան էի ուզում գնալ, ձեռքերս կանդալած՝ ասել են այդպես գնա։
Հասել եմ տուն, կինս շտապօգնություն է կանչել, եկել են, սրսկել։ Կնոջս թելադրել եմ, ամբողջությամբ գրել է տեղի ունեցածը»,- պատմեց ոստիկանությունում խոշտանգված անձը։
Բռնության ենթարկված Սերգեյ Աբրահամյանի փաստաբան Արա Ղարագյոզյանն իր հերթին շեշտեց՝ սա անպատժելիության հերթական դեպքն է։
«Որևէ հիմք չի եղել տուժողի նկատմամբ բռնություն կիրառելու։ Այդ ո՞նց ոստիկանությունում պարզեցին, որ տուժողը խոչընդոտել է, ոստիկաններն էլ համաչափ ուժ են կիրառել, այն դեպքում, որ ո՛չ տուժողին են լսել, ո՛չ ոստիկաններն են հարցաքննվել։ Իսկ ոստիկանությունը նման հայտարարություն է տարածել։ Փորձում են տպավորություն ստեղծել, որ ոստիկանությունը օրենքի սահմաններում է գործել, իսկ քաղաքացին չի ենթարկվել ոստիկանության օրինական պահանջին։ Ի՞նչ օրինական պահանջի մասին է խոսքը։ Եթե տուժողն անգամ չի ուզել, որ իրեն ձեռնաշղթաներ հագցնեն, ոստիկանները կարող էին զսպող միջոցներ իրականացնել, ոչ թե բռնություն կիրառել։ Ո՞նց կարող է ոստիկանությունն իրեն այդ ձևով պահել, այն դեպքում, երբ կինը նկարահանում էր։ Պատկերացրեք՝ ոստիկանության բաժնում, երբ նկարահաող չի եղել, տուժողն անպաշտպան է եղել, ինչ բռնություններ են կիրառվել։ Եվ մինչև օրս ընդամենը քրեական վարույթ է նախաձեռնվել խոշտանգման մեղադրանքով, սակայն մինչ օրս որևէ ոստիկանի մեղադրանք չի առաջադրվել»,- ասաց փաստաբանը։
Հիշեցնենք, որ փաստաբան Արա Ղարագյոզյանն օրեր առաջ ահազանգել էր ոստիկանական խոշտանգումների հերթական դեպքի մասին՝ հրապարակելով տեսանյութ և լուսանկարներ, որոնք փաստում են ոստիկանների՝ քաղաքացու նկատմամբ կիրառված բռնությունը։
Քաղաքացի Սերգեյ Աբրահամյանը ապրիլի 28-ին որպես վկա ներկայացել է Արմավիրի քննչական բաժին, սակայն նրան չեն ընդունել։ Ըստ Աբրահամյանի՝ հաջորդ օրը մի խումբ ոստիկաններ գնացել են նրա բնակարան։ Քաղաքացին նրանց հետ պատրաստվել է ներկայանալ բաժին, սակայն բնակարան են ներխուժել այլ ոստիկաններ ու Աբրահամյանին բռնության ենթարկել կնոջ աչքի առաջ։ Հետո տարել են ոստիկանության բաժին, որտեղ դաժան ծեծի են ենթարկել։
Դեպքի առնչությամբ ապրիլի 29-ին քրեական վարույթ է նախաձեռնվել։
ՀՀ ներքին գործերի նախարարի մամուլի քարտուղար Նարեկ Սարգսյանը դեպքի առնչությամբ հայտարարություն է տարածել՝ պնդելով, որ անձը դրսևորել է ոչ պատշաճ վարք՝ չենթարկվելով ոստիկանության ծառայողների օրինական պահանջներին։
