Ամենահավաստի աղբյուրը ժողովուրդն է։ Մարդիկ, ովքեր հարաբերվում են, առնչվում են որոշակի շրջանակի հետ։ Այդ մեզ է թվում, թե այն, ինչը մենք խոսում ենք, ամենը գաղտնիք է։ Ինֆորմացիոն հիմքերը բազմազան են. ամենահավաստին ՀՀ այն քաղաքացիներն են, ովքեր գիտեն այդ թեմաների մասին։ Այսօր լրագրողների հետ զրույցում այս մասին ասաց ՀՀ վարչապետ Նիկոլ Փաշինյանը՝ պատասխանելով ամիսներ առաջ իր կողմից հոգևորականների անձնական կյանքին վերաբերվող տվյալների հրապարակման վերաբերյալ հարցին։
Ճշգրտող հարցին՝ երբ ինքը խոսում էր հոգևորականի և նրա քեռակնոջ մասին, ո՞ր սրբազանին նկատի ուներ՝ արդյոք Արշակ սրբազանին, Փաշինյանը պատասխանեց.
«Պետք է ցավով նշեմ, որ չեմ կարող վստահ լինել, որ նման դեպքերը եզակի են։ Իմ օրինակի մասին՝ ինչ հարկ եմ համարել, ասել եմ, հետո էլ ասածիս համար ներողություն եմ խնդրել։ Եվ դա է այն պրոբլեմը, որը մենք համարում ենք այլևս անհանդուրժելի»։
Պատասխանելով Վեհափառի եղբոր՝ Եզրաս արքեպիսկոպոս Ներսիսյանի՝ ՌԴ նախագահի կողմից ստացած պարգևի վերաբերյալ հարցին՝ Փաշինյանը շեշտեց՝ հրապարակված փաստաթղթերը ակնհայտ են դարձնում, որ վերջինս խորհրդային ժամանակներից հավաքագրվել է որպես ՊԱԿ գործակալ։
«Դա փաստ է»,- ասաց նա։
