Հռոմի պապի առողջությունը դեռ վտանգի տակ է

Հռոմի Ֆրանցիսկոս պապի վիճակը կիրակի օրվա ընթացքում կայուն է մնացել, և նա այլևս թոքերի արհեստական շնչառության կարիք չի ունեցել, ինչը վկայում է երկկողմանի թոքաբորբի դեմ 88-ամյա պոնտիֆիկոսի պայքարում առաջընթացի մասին, հայտնում է Reuters-ը՝ հղում անելով Վատիկանի մամուլի ծառայությանը։

Ֆրանցիսկոսը երկու շաբաթից ավելի գտնվում է Հռոմի Ջեմելի հիվանդանոցում: Նա հոսպիտալացվել է փետրվարի 14-ին ծանր շնչառական վարակով, որը հանգեցրել է այլ բարդությունների։

«Սրբազան Հոր առողջական վիճակը ողջ օրվա ընթացքում մնացել է կայուն»,- ասվում է պոնտիֆիկոսի վիճակի մասին կիրակի հրապարակված վերջին հայտարարության մեջ։

Վատիկանի հայտարարության համաձայն, Հռոմի պապն այլևս թոքերի արհեստական շնչառության կարիք չունի, բայց շարունակում է թթվածին ստանալ քթի տակ դրված փոքրիկ խողովակի միջոցով:

Հայտարարության մեջ ասվում է, որ Ֆրանցիսկոս պապը կիրակի օրը ջերմություն չի ունեցել:

Նշվում է նաև, որ բժիշկները նրա վիճակը գնահատում են «զգուշավոր»՝ «կլինիկական պատկերի բարդության» պատճառով, ինչը նշանակում է, որ Հռոմի պապի առողջությունը դեռ վտանգի տակ է։