Հաճախ շատ բաներ քննարկում ենք և դիտարկում ենք խնդրի միայն մեկ ուղղությունը, բայց չենք նայում դրա խորքային պատճառները։ Հիմա հիպոթետիկ պատկերացրեք՝ Դուք իշխանությունն եք, և Ձեր թիմում հայտնվել է մարդ, որը միայն խնդիրներ է ստեղծում։ Ի՞նչ եմ ուզում ասել. այսինքն՝ այստեղ կա նաև օբյեկտիվիզմ։ Azg.am-ի թղթակցի հետ զրույցում նմա տեսակետ հայտնեց քաղաքագետ Արա Պողոսյանը՝ անդրադառնալով ՔՊ խմբակցության պատգամավոր Հռիփսիմե Հունանյանի՝ ԱԺ Առողջապահության հարցերի մշտական հանձնաժողովի նախագահի պաշտոնից հրաժարական ներկայացնելու և ՔՊ համամասնական ցուցակում ընդգրկվելուց ինքնաբացարկ հայտնելու որոշմանը:
«Եթե խնդիրը դիտարկում ենք առանց հաշվետվողականության մարդուն այս կամ այն պաշտոնում նշանակել-ազատելու համատեքստում, դա մեկ խնդիր է։ Բայց եթե խոսում ենք կոնկրետ կերպարների մասին, սա բոլորովին այլ հարց է։
Պատահաբար նկատեցի Հռիփսիմե Հունանյանի՝ հատկապես վերջին հայտարարությունը։ Այս անձի բոլոր հայտարարություններն իսկապես շատ էքստրաօրդինար են, հետևաբար տրամաբանական եմ գտնում, որ նա հրաժարական է ներկայացնում ԱԺ Առողջապահության հարցերի մշտական հանձնաժողովի նախագահի պաշտոնից։ Սա տրամաբանական է, որովհետև այդ պաշտոնն այլ որակներ պահանջող պաշտոն է։
Իմ խորին համոզմամբ՝ այստեղ գործ ունենք վատ մենեջմենթի, թիմի վատ մոդեռացիայի հետ։ Եվ ընդհանրապես, եթե լայն վերցնենք, այդ անձի նշանակումը պայմանավորված է եղել ընդամենը պահի քաղաքական նպատակահարմարությամբ։ Այսպիսի նշանակումները գերթե բոլոր դեպքերում նույն քաղաքական նպատակահարմարությամբ էլ փոխվում են»,- ասաց Արա Պողոսյանը՝ նշելով, որ խորքային երևույթներ կամ հակասություններ այս գործընթացում չի տեսնում։
Անդրադառնալով Հռիփսիմե Հունանյանի՝ նաև ՔՊ համամասնական ցուցակում ընդգրկվելուց ինքնաբացարկ հայտնելու որոշմանը, մեր զրուցակիցը նկատեց՝ եթե թիմը ցանկանա, ինչպես ՔՊ-ական մեկ այլ պատգամավոր Հայկ Սարգսյանի պարագայում տեղի ունեցավ, Հռիփսիմե Հունանյանը ևս նախընտարական ցուցակում չի հայտնվի։
«Գուցե վերջին պահին Հունանյանի մոտ ինքնասիրության զգացում է արթնացել, և նա որոշել է, որ եթե իր հետ այդպես են վարվում, ավելի լավ է ՝ ցուցակում չլինի։ Մեկ բան ևս ֆիքսենք. այն մարդիկ, որոնք ամենաշատ են իրենց վրա հարված վերցնում, հետո փորձում են հրապարակային խոսույթների միջոցով արդարացնել իշխանությանը, և ամենամեծ նեղվածությունը, երևի թե, հենց սրանից է գալիս»,- ամփոփեց քաղաքագետը։
Հիշեցնենք, որ ԱԺ «Քաղաքացիական պայմանագիր» խմբակցության պատգամավոր Հռիփսիմե Հունանյանը հրաժարական է ներկայացրել ԱԺ Առողջապահության հարցերի մշտական հանձնաժողովի նախագահի պաշտոնից:
Նա նաև հավելել է, որ ինքնաբացարկ է հայտնել առաջիկա խորհրդարանական ընտրություններում «Քաղաքացիկան պայմանագիր» կուսակցության համամասնական ցուցակում ընդգրկվելուց:
