10 տարի առաջ այս օրը` 2 հունիս 2016-ին, Գերմանիայի Դաշնային Հանրապետության Խորհրդարանը (Բունդեսթագ) գրեթե միաձայն ընդունված հատուկ Բանաձեւով ճանաչեց Հայոց ցեղասպանությունը։
Ստորեւ մի հատված ճանաչման բանաձեւից` հայերեն թարգմանությամբ։
Իսկ տեսանյութը վերհիշեցնում է Ճանաչման Բանաձեւի ընդունմանը հաջորդող րոպեները, երբ մի խումբ հայերս, որոնք ներկա էին այդ պատմական նիստին, ուղղվեցինք Ռայխսթագի մատուռ` գոհաբանական աղոթք առաքելու առ Աստված։
*
«Հիշատակում եւ ոգեկոչում
1915/16 թթ. հայերի եւ քրիստոնյա այլ փոքրամասնությունների դեմ [իրագործված] Ցեղասպանության»
«Գերմանական Բունդեսթագը խոնարհվում է Օսմանյան կայսրության հայերի եւ քրիստոնյա այլ փոքրամասնությունների նկատմամբ կիրառված տեղահանությունների եւ կոտորածների զոհերի առջեւ, որոնք սկսվեցին շուրջ հարիւր տարի առաջ: Բունդեսթագը դատապարտում է այն ժամանակվա երիտթուրքական կառավարության արարքները, որոնք պատճառ դարձան Օսմանյան կայսրութեան հայության գրեթե ամբողջական բնաջնջման: Տեղահանությունների եւ կոտորածների զոհ դարձան նաեւ քրիստոնյա այլ ժողովուրդների անդամներ, մասնաւորաբար` ասորա-արամեական եւ քաղդեական։
Այն ժամանակվա երիտթուրքական կառավարության հրահանգով 24 Ապրիլ 1915-ին օսմանական Կոստանդնուպոլսում սկսվեցին ավելի քան մեկ միլիոն հայազգիների ծրագրված տեղահանությունն ու բնաջնջումը: Նրանց ճակատագիրը տիպիկ օրինակ է զանգվածային բնաջնջումների, ազգային մաքրագործումների, տեղահանությունների, այո նաեւ ցեղասպանությունների, որոնցով տարաբախտորեն արձանագրված է 20-րդ հարյուրամյակը: Այնուհանդերձ մենք հասկանում ենք Հոլոքոստի եզակիությունը, որի համար Գերմանիան մեղավոր է եւ պատասխանատու:
Բունդեսթագը ցավով է արձանագրում Գերմանական Ռայխի անփառունակ դերակատարությունը, որը հակառակ հայերի կազմակերպված տեղահանությունների եւ բնաջնջումների մասին գերմանական դիվանագետների եւ միսիոնարների կողմից փոխանցված միանշանակ տեղեկությունների փորձ չարեց կանգնեցնել մարդկայնության դեմ գործված այս ոճրագործությունը: Գերմանական Բունդեսթագի ներկա այս ոգեկոչումը հողագնդի այս հնագույն քրիստոնյա ազգի նկատմամբ ցուցաբերված յուրայատուկ հարգանքի արտայայտություն է…»։
Տեսանյութը` Տաթեւ Հանեսյանի
