Եվրո-2020-ի F խմբի վերջին՝ 3-րդ տուրում մրցեցին Պորտուգալիայի և Ֆրանսիայի հավաքականները։ Բուդապեշտում կայացած խաղն ավարտվեց ոչ-ոքի՝ 2։2։
Հանդիպման 30-րդ րոպեին Ուգո Լյորիսը օդային պայքարում հարվածել է Դանիլոյին, ինչի պատճառով մրցավարը նշանակել է 11-մետրանոց։ Կրիշտիանո Ռոնալդուն դիպուկ է իրացրել այն՝ բացելով հաշիվը։
Առաջին կեսի ավելացված ժամանակում Նելսոն Սեմեդուն տուգանային հրապարակում խախտել է կանոնները Մբապեի նկատմամբ։ 11-մետրանոց հարված, որը հստակ է իրացրել հավաքական վերադարձած Կարիմ Բենզեման՝ Ֆրանսիայի ընտրանու կազմում 5 տարի անց դառնալով գոլի հեղինակ։
Երկրորդ խաղակեսի մեկնարկից ընդամենը 2 րոպե անց Կարիմ Բենզեման դուբլ է ձևակերպել՝ առաջ մղելով ֆրանսիացիներին։
60-րդ րոպեին Կունդեն ձեռքով է խաղացել տուգանային հրապարակում և մրցավար Անտոնիո Մատեո Լաոսը հանդիպման 3-րդ 11-մետրանոցն է նշանակել։ Ռոնալդուն ևս հստակ է իրացրել այն՝ նույնպես դառնալով դուբլի հեղինակ։ Պորտուգալացի աստղը հավաքականում խփած 108 գոլով հավասարվել է ռեկորդակիր Ալի Դայեին (Իրան)։
Այսպիսով, Ֆրանսիայի հավաքականը 5 միավորով առաջին տեղն է զբաղեցնում և դուրս գալիս փլեյ-օֆֆ, որտեղ մրցակիցը կլինի Շվեդիայի հավաքականը։ Պորտուգալիայի ընտրանին 3-րդ տեղով է դուրս գալիս փլեյ-օֆֆ փուլ, մրցակիցը կլինի Բելգիան։
