Հայաստանում Վրաստանի դեսպանատան դիմաց այսօր կեսօրից շարունակվում է կոնյակագործների բողոքի ակցիան։ Ալկոհոլային խմիչք արտադրող ընկերությունները պահանջում են վերացնել վրացական սահմանին առկա խոչընդոտները և թույլ տալ, որպեսզի հայկական կոնյակը վրացական սահմանով անարգել հասնի Ռուսաստան և աշխարհի այլ երկրներ։
Հատկանշական է, որ մինչ այս պահը Վրաստանի դեսպանատնից որևէ մեկը չի ընդունել ակցիայի մասնակիցներին։ Միայն խնդրել են կոնյակ արտադրող և բեռնափոխադրող ընկերությունների անուններով ցուցակներ տրամադրել իրենց։
«Պռոշյանի» կոնյակի գործարանի կոնյակագործներից Կամո Ամիրխանյանը լրագրողների հետ զրույցում նշեց, որ հայկական կոնյակի արգելափակում ոչ այլ ինչ է, քան վրացական կողմի սադրանք։
«Իսկ մենք թույլ ենք, չենք կարողանում ասել՝ ախպեր ջան խի՞ եք սադրանք անում, խի՞ չեք թողնում մեր ֆուռերը գնան, Ռուսաստան հասնեն։ Ոչ միայն էկոնոմիկայի նախարարը, այլև վարչապետը պետք է վեկալեր հեռախոսը, զանգեր ասեր՝ ախպե՛ր ջան, վրացի՛ ջան, ինչո՞ւ չեք թողնում՝ մեր ֆուռերը գնան, տեղ հասնեն։ Պատճառն ասեք՝ մի թողեք։
Այո՛, վարչապետն է թուլություն դրսևորում։ Նայում ես՝ վրացին եկավ, վարչապետն եկավ, նախագահն եկավ, ասեցին՝ մենք իրար ախպերներ ենք։ Ինքը գնաց Վրաստան, բայց ոչ մի բան։ Էդ գնալ-գալը, շփումները նրա համար են, որ էսօր սենց բաներ չլինեն»,- ասաց կոնյակագործը՝ չբացառելով, որ վրացական սահմանին ստեղծվող խոչընդոտների հետևում կանգնած է Ադրբեջանը։
Կամո Ամիրխանյանը նշեց, որ պատրաստ են ընդհուպ բողոքի ակցիա կազմակերպել կառավարության շենքի դիմաց։
«Որովհետև սա ստրատեգիական խնդիր է. գործարանը չի աշխատում, մարդիկ մնում են գործազուրկ։ Գյուղացին իր արտադրանքն ո՞ւմ է տալու։ Գործարանը հարկեր չի տալու, հարկեր չտվեց՝ թոշակներ չեն լինելու, ոստիկանին գումար չեն կարողանալու տան, պաշտպանության ծախսեր չեն կարողանալու հոգան։ Ո՞նց է լինելու»,- հարց հնչեցրեց կոնյակագործը։
Նշենք, որ դեպի Ռուսաստան և մերձբալթյան երկրներ Լարսով ալկոհոլային խմիչքներ արտահանող ընկերությունները վերջին մեկուկես ամսվա ընթացքում ենթարկվում են տարօրինակ ստուգումների։ Մասնավորապես, կոնյակագործները չգիտեն, թե ինչու է որոշում կայացվել Վրաստանի սահմանում լաբորատոր զննության ենթարկել հայկական արտադրության կոնյակը։
