«Սիթի օֆ Սմայլ» բարեգործական հիմնադրամը նոր նախագիծ է մեկնարկում «ռեԱրմենիա» համագործակցության հարթակում, որը թույլ կտա ամեն ամիս օգնել 10-ից 30 երեխայի։
Մասնավորապես, հիմնադրամը հոգում է քաղցկեղ ունեցող երեխաների ախտորոշիչ լաբորատոր հետազոտությունների, քիմիաթերապիայի, ճառագայթային թերապիայի, իմունաթերապիայի, վիրաբուժական միջամտությունների, սիմպտոմատիկ դեղորայքի հետ կապված բոլոր ծախսերը, ինչպես նաև տրամադրում է հոգեբանական աջակցություն և օրական 4-անգամյա սնունդ:
Քաղցկեղով հիվանդ 10 երեխային քիմիաթերապևտիկ և սիմպտոմատիկ դեղորայքով ապահովելու համար անհրաժեշտ է ամսական 2 000 000 դրամ։
«Օգնեք Հայաստանի և Արցախի երեխաներին պայքարել քաղցկեղի դեմ» նախագծի շրջանակում «ռեԱրմենիա» հարթակում ամսական բաժանորդագրության գործիքի շնորհիվ դոնորները կարող են մեկ անգամ ձևակերպել ամսական նվիրատվություն, որից հետո ամեն ամիս համակարգը ավտոմատ կկատարի փոխանցումները։
Ամեն տարի Հայաստանում ախտորոշվում է մանկական քաղցկեղի մոտ 100 նոր դեպք։
Առանց ֆինանսական աջակցության երեխաների շրջանում քաղցկեղի ապրելիության մակարդակն անխուսափելիորեն կնվազի ճշգրիտ ախտորոշում ստանալու անկարողության, ախտորոշման հետաձգման և հիվանդության պրոգրեսիայի, թերապիայի անհասանելիության, բուժումից հրաժարվելու և հնարավոր ռեցիդիվների պատճառով:
Կոնտակտային անձ՝ Անժելա Ալեքյան, Թամարա Ափոյան
Հեռ՝ 091 34 94 00, 043 21 77 77
Էլ.հասցե՝ info@rearmenia.com, tamara@cityofsmile.org
