Պաշտպանության նախկին փոխնախարար, ՀՀԿ գործադիր մարմնի անդամ Արտակ Զաքարյանն արձանագրում է, որ գործող իշխանության՝ «Քաղաքացիական պայմանագրի» թույլ տված տարաբնույթ բացթողումների կամ սխալների հետևանքով՝ Հայաստանի նկատմամբ արտաքին ազդեցության գործոնները բավական շատացել են։
Նրա համոզմամբ՝ ՔՊ-ն, ասես ջանք ու եռանդ չխնայելով, անում է հնարավորն ու անհնարինը, որ խորացնի Ռուսաստանի՝ հայերի ու Հայաստանի նկատմամբ տածած թշնամանքը։
«Հայաստանյան մերօրյա իշխանավորները ՌԴ-ի հետ ուղղակի հակամարտության մեջ գտնվող երկրներին օգնում, օժանդակում են, որ վերջիններս կարողանան Ռուսաստանին դուրս բերել տարածաշրջանից։ Բայց նրանք մի հասարակ ու ակնհայտ փաստի հետ հաշվի չեն նստում, այն է՝ Հայաստանի ու Արցախի անվտանգության միակ երաշխավորն այս պահին բացառապես Ռուսաստանի Դաշնությունն է»,- մանրամասնում է նախկին փոխնախարարը։
Արտակ Զաքարյանը կասկած անգամ չունի, որ մեր արտաքին անվտանգության ամենամեծ սպառնալիքը գործող իշխանությունն է։ «Մեր երկրի անվտանգության հարցն այսօր ինքնահոս է վիճակում է՝ «ինչ լինում է, թող լինի» տարբերակով։
Փաշինյանի ու նրա թիմակիցների անելիքն այսօր հասարակության գիտակցությունն ամենատարբեր մանիպուլյացիաների ու խաբեությունների միջոցով թմրեցնելն»,- շեշտում է ՀՀԿ-ականը:
Ս․Վ․
