Օրեր առաջ կորած երեքամյա Տիգրանի մասին որևէ նորություն չկա, այս պահին որոնողական աշխատանքները շարունակվում են, նույն տեմպով, տեմպը չի թուլանում, բայց որևէ բան չեմ կարող ասել, այսօր լրագրողների հետ զրույցում նշեց Գեղարքունիքի մարզպետ Կարեն Սարգսյանը։
Դիտարկմանը, որ նախօրեին երեխայի հորաքույրը նշել է՝ երեխայի չխոսող եղբայրը հարաքննության ժամանակ ձեռքն աընդհատ կոկորդին է տարել, այդ մասով որևէ տեղեկություն կա՞, ի՞նչ վարկածներ են շրջանառվում, մարզպետը պատասխանեց ՝հարուցված քրեական գործ կա, ոչ մի վարկած չի բացառվում, բոլոր վարկածներն էլ քննարկվում և ուսումնասիրվում են ։
«Չբացառելով որևէ վարկած՝ որոնողական աշխատանքներ են իրականացվում։ Ոչ մի հետք չկա»,- ասաց Կարեն Սարգսյանը։
Նա միաժամանակ նշեց, որ առաջիկայում ֆինանսական օգնություն կցուցաբերեն կորած երեխայի անապահով ընտանիքին։ Մինչ այս պահը, սակայն, ընտանիքն աջակցություն ստանալու խնդրանքով մարզպետարան չի դիմել։
«Որևէ աջակցություն մեր կողմից չեն ստացել, բայց համայնքապետարանից ստացել են։ Լուրեր էին շրջանառվում, որ մարզպետն ասել է՝ մարզպետարանն աջակցություն է ցուցաբերել, բայց դա իրականություն չի։ Ես այդպես չեմ ասել։
Մենք կարող ենք նաև որոշակի գումար տրամադրել՝ վառելիքի, հագուստի ձեռքբերման, տնային պայմանների բարելավման համար»,- ասաց մարզպետը՝ միաժամանակ հավելելով, որ կապի մեջ են Աշխատանքի և սոցիալական հարցերի նախարարության հետ՝ ընտանիքին երկարաժամկետ աջակցություն տրամադրելու հարցով։
Կարեն Սարգսյանը հիշեցրեց՝ փոքրիկի ընտանիքն այսպես թե անպես հաշվառված է, նրանց սոցիալական աջակցություն տրամադրվում է՝ մեկ անձ մոտ 60 հազար դրամ թոշակ է ստանում, երեխայի համար ևս մոտ 50 հազար նպաստ է տրամադրվում։
«Կփորձենք առաջիկայում ընտանիքին ինչ-որ ծրագրում ներառել, ավելի մեծ աջակցություն ցուցաբերել »,- ասաց մարզպետը։
Հիշեցնենք, որ Գեղարքունիքի մարզի Ծափաթաղ գյուղում շարունակվում են անհետացած երեքամյա Տիգրանի որոնողական աշխատանքները, որոնցում ներգրավված են ոստիկանության և փրկարարների մեծաթիվ ուժեր։ Որոնողափրկարարական աշխատանքներն իրականացվում են ինչպես գյուղի տարածքում, այնպես էլ հարակից անտառներում և Սևանա լճի ափին։
