Արցախի Քարագլուխ բարձունքի դեպքերից մեկ տարի անց Փառուխ ու Խրամորթ գյուղերում իրավիճակն ու պատկերն այժմ էլ նույնն է։ «Ազգ»-ի հետ զրույցում ասում է ՀՀ Ազգային ժողովի նախկին պատգամավոր Սոֆյա Հովսեփյանը, որ արդեն տևական ժամանակ Արցախում է աշխատում ու բնակվում։
«Այդ դեպքերի ժամանակ արդեն Փառուխ գյուղը դատարկ էր, իսկ Խրամորթում պատկերը փոքր-ինչ այլ է, այստեղ մարդիկ քիչ թե շատ ապրում են, բայց բոլորս էլ հասկանում ենք ու գիտենք ապրելու այդ ռիսկերը»,- ասում է նա։
Նրա փոխանցմամբ՝ Արցախում ընդհանուր իրավիճակը ծանր է, մարդիկ անորոշության մեջ են, իսկ տնտեսական ճգնաժամը ժամ առ ժամ խորանում է․ «Շինարարությունը կանգնած է, վառելիքի բացակայության հետևանքներն անհամեմատելի մեծ են, խնդիրներն օր օրի խորանում են։ Բայց էդ ամենում մի լուսավոր կետ կա, ու դա այն է, որ համառ են իրենց տանն ապրելու վճռական որոշման մեջ»,- ընդգծում է Հովսեփյանը։
Ս․Վ․
