Արմավիրի մարզի Լուսագյուղի բնակիչներն այս պահին փակել են գյուղի ճանապարհը՝ այսկերպ արտահայտելով իրենց բողոքն ու ցասումը։ Ժամկետային զինծառայող Վահե Թորոսյանը մասնակցել է սետտեմբերի 13-ի մարտական գործողություններին։ Նա ծառայում էր Կապանի զորամասում։ Վահեն վերջին անգամ հարազատների հետ խոսել է սեպտեմբերի 15-ին, հետո ընկերներին ասել է, որ 3 տեղից վիրավոր է։ Շուտով մեկ ամիսը կլրանա, ինչ Վահեից ոչ մի լուր չկա։ Ծնողները պնդում են, որ նրա տեղը գիտեն, Վահեն վիրավոր ընկած է։ Մինչև հիմա ոչ ոք նրան օգնության չի գնացել ու մարտի դաշտից չի հանել։ Վահեի հարազատները, նաև մյուս անհետ կորածների ծնողները ՊՆ-ն մոտ պարբերաբար բողոքի ակցիաներ են անում, սակայն՝ ապարդյուն։ Նախարարությունից ոչ մի պատասխան, Կարմիր խաչից՝ նույնպես։ Միայն ասում են, որ այն հատվածը, որտեղ ենթադրվում է, որ Վահեն է, ադրբեջանցիները նշանառության տակ են պահում, անընդհատ կրակում են։
Սեպտեմբերյան պատերազմի հետևանքով ունենք 200-ից ավելի զոհված ու անհետ կորած, 300 վիրավոր։ Նույնիսկ չի նշվում, պաշտոնական ոչ մի տվյալ չկա, թե քանի անհետ կորած ունենք։
Լուսագյուղի ճանապարհն այս պահին փակ է։ Լուսագյուղցիներին են միացել նաև Էջմիածնի մյուս գյուղերի բնակիչները։ Նշենք, որ Վահե Թորոսյանի հորն ու պապին կանչել են մարզպետարան, քանի որ իմացել են, որ այսօր ճանապարհ են փակելու։
«Իրենք ծնող չե՞ն։ Մարզպետը նույն պատասխանն ասաց՝ բոլորը գիտեն, զբաղվում են, հետաքրքվում են, ավել ոչինչ չասացին։ Երեխա եմ տվել բանակին։ Այս ճամփով ուղարկել եմ ծառայության, այս ճամփով թող հետ բերեն։ Այս ճամփան փակելու եմ, մինչև երեխայիս բերեն»,- հայտարարեց Վահե Թորոսյանի հայրը։
Նա պատմեց, որ Վահեն չի փախել, մինչև վերջ զենքը ձեռքին է եղել՝ չնայած վիրավոր։ Սեպտեմբերի 18-ից ինքը Կապան է գնացել՝ որդուն որոնելու։ Կարմիր խաչի ներկայացուցիչն ասել է՝ պետք է վստահ լինենք, որ կրակոց չի լինի, հետո միայն հնարավոր է գործողություն անել, այդ տարածք մտնել։
Վահեի գտնվելու վայրը Վարին Հանդի հատվածում է։
«Նիկոլ Փաշինյան, Սուրեն Պապիկյան, տուն եք քանդում, անխիղճներ։ Եկեք տեսեք, գյուղացին ոնց է տանջվելով ապրում։ Ո՞ւր է իմ երեխան։ Ես ձեզ առողջ երեխա եմ տվել»,- վրդովվեց Վահեի մայրը։
