«Իռլանդիան կոչ է անում ադրբեջանական իշխանություններին առանց նախապայմանների վերականգնել Լաչինի միջանցքով տեղաշարժի ազատությունն ու անվտանգությունը՝ 2020 թվականի նոյեմբերի 9-ի հայտարարության դրույթներին համապատասխան։
Կոչ ենք անում նաև շարունակել հաշտեցման գործընթացը, ինչը թույլ կտա խուսափել մարդկային կյանքերի հետագա անիմաստ կորստից։ Միջանցքի փակումը կարող է հանգեցնել հումանիտար լուրջ ճգնաժամի։ Իռլանդիան կողմ է հարցը բանակցային գործընթացի միջոցով լուծելուն, ինչպես նաև Լեռնային Ղարաբաղի երկարաժամկետ կարգավիճակի հստակեցմանը։ Մենք վերհաստատում ենք մեր լիակատար աջակցությունը ԵԱՀԿ Մինսկի խմբին, որն էլ պետք է հասնի վերոնշյալ նպատակների իրագործմանը», – հայտարարեց ՄԱԿ-ում Իռլանդիայի ներկայացուցիչը։
Ինչպես տեսնում ենք, դեկտեմբերի 21-ի գիշերը տեղի ունեցած ՄԱԿ-ի Անվտանգության խորհրդի նիստում, որտեղ քննարկվում էր Բերձորի միջանցքն ադրբեջանցիների կողմից փակելու՝ Հայաստանի առաջ քաշած հարցը, ամենանպատակային ելույթով հանդես է եկել Իռլանդիայի ներկայացուցիչը։
ՌԴ ներկայացուցիչն իր խոսքում նշեց. «Ակնկալում ենք, որ տրանսպորտային հաղորդակցությունը լիարժեք կվերականգնվի ամենամոտ ապագայում։ Ռուսական կողմը՝ Պաշտպանության նախարարության, խաղաղապահ զորախմբի ներգրավմամբ, վերջին օրերին գործադրում է բոլոր անհրաժեշտ ջանքերը Լաչինի միջանցքում իրավիճակը շուտափույթ կարգավորելու համար։
Ադրբեջանցի և հայ գործընկերների հետ պարբերական հանդիպումներ են կազմակերպվում, ինչի շնորհիվ Լեռնային Ղարաբաղ գազի մատակարարումը վերականգնվեց, Լաչինի միջանցքը մասնակի բացվեց»։
