Հայաստանում շատերի համար այսօր ձմեռային սովորական օր է, օրացուցային ամսաթիվ՝ 22, իսկ Արցախում ամեն անցնող օր իր հետ անվերադարձ տանում է կենցաղային, ապրուստի միջոցների ևս մի բաժին։ Իսկ ամեն նոր օր բացվում է՝ հանապազօրյա հացը խնայողությամբ օգտագործելու ու նոր փորձության ենթարկվելու վախով։
Արցախցիները չեն կոտրվում, ճիշտ է, բայց 11 օր լիակատար շրջափակված լինելով՝ 120 հազար մարդ ի՞նչ երաշխիքով է դիմավորելու պատանդառության հերթական՝ 12-րդ օրը։
Աշխարհում չկա մի կետ, մի վայր՝ անգամ պատերազմական ամենաթեժ հատվածում, նույնիսկ տարատեսակ կասկածելի ու վտանգավոր ուժերի խաչմերուկ Սիրիայում, որտեղ 120 հազար մարդ պատանդի կարգավիճակում լինի։
120 հազար հայ այսօր Արցախի ճանապարհը փակած մի քանի տասնակ «բնապահպան» ադրբեջանցու պատանդն է։
Արցախում բանկոմատները չեն աշխատում, միայն բանկերի գլխամասային բաժանմունքներից կարելի է գումար ձեռք բերել, այն էլ՝ քիչ։
Իսկ գյուղերում իրավիճակն ավելի վատ է. այնտեղ նաև վառելիքի պակաս կա։
Արցախում այսօր ամուսնություն է գրանցվել։
Շրջափակված Արցախի դրամատիկական թատրոնում ներկայացումներ են բեմադրվում, արցախցին թատրոն է գնում։
Արցախն՝ այսօր… հույսի ու հուսահատության լուսանկարներում
