Հանձնվողներին չեն օգնում, ասում են՝ գնացեք, հանձնվեք․ Վարդանյան

Ընդդիմադիր պատգամավոր Քրիստինե Վարդանյանի համոզմամբ՝ հայաստանյան իշխանությունները, խոսելով Հայաստան-Ադրբեջան, Հայաստան-Թուրքիա, Արցախ-Ադրրբեջան հարաբերությունների մասին, տպավորություն են ուզում ստեղծել, թե խնդիրը միայն Հայաստան-Ադրբեջան հարաբերություններում կա, մնացած հարցերում ամեն բան կարգին է։

Ըստ նրա՝ Ադրբեջանի նպատակները շատ ավելի հեռուն գնացող են։ Մանրամասնում՝ մեր վայ-հարևաններն Արցախը որպես պլացդարմ են համարում, ինչի վրա ոտք դնելով՝ կարողանալու են նաև Հայաստանի «հարցերը լուծել»։

«Բայց Հայաստանի ղեկավարությունն այնպես է ցանկանում անել, որ մարդիկ որևէ կերպ չզգան այդ վտանգը։ Եթե աշխարհում գեթ մեկ կառույց կա, որ ի զորու է պաշտպանել մեր երկրի շահերը, դա Հայաստանի Հանրապետությունն է։ Բայց մեր երկիրը ձեռքերը լվանում է իր հիմնական պարտավորություններից, պատային այսպիսի իրավիճակի առաջ կանգնում ու սկսում այլ երկրներից օգնություն ակնկալել։

Եթե ինեքներս չենք պաշտպանում մեր երկիրը, ուրիշ ո՞վ է գալու՝ պաշտպանի։ Հանձնվողներին չեն պաշտպանում, այլ ասում են՝ գանցեք, հանձնվեք, հետո մենք կգանք, կհսկենք այն սահմանը, որտեղ կանգնել եք»,- նշում է «Հայաստան» խմբակցության պատգամավորը։

Ս․Վ․